[必讀]判刑前後親友40個需知
1. 判刑前
記低親友個人資料(身分證號碼、銀行密碼、朋友聯絡方法etc)
了解親友鍾意啲咩，想睇咩類型嘅書，方便之後由親友搜羅；
熟習親友私人物品擺放地方
袋起親友私人物品(銀包、手機)
記好律師聯絡方法，以便了解親友最新情況
假如有得保釋候審，喺上庭前兩日搵私家醫生做檢查，包括檢查身體表面傷同照關節位X光，報告最好分別由律師、家人同朋友各留一份，有事就拎出嚟告懲教虐犯
2. 判刑後
律師會見當事人，會面後向律師了解親友去邊個監獄
懲教熱線：25113511，可以查詢所在監獄同探訪情況
如果你被親友選中成為聯絡人（多數兩個人），由呢一刻開始電話唔好離身，福利官會隨時打畀你講親友去咗邊個監獄同親友號碼
由親友入獄到出獄嗰日都要留意電話，監獄入面有樣嘢叫電話紙，親友可能會寫低畀親友囗訊，福利官會每日或隔日打電話傳囗訊（特別係判刑後一個月只可探訪最多4次，有特別嘅事情唔能夠即時傳達到牆外，就要靠福利官。）
第一次探訪
每個監獄探訪流程各有不同，詳細請參考其他文章
見到先睇下有無表面傷痕
3. 寫信
家屬寫信可以用屋企地址，因為懲教都會知道屋企地址。朋友特別有發夢的話盡量避免用自己地址，最好用郵箱（如果唔想額外洗錢可以搵支援組織代收發信件）
預咗內容全世界（政府）會睇曬同留底
信封面寫監獄地址及囚號（不要寫人名）
信封封囗的反摺位，寫全名及囚號，方便懲教核對資料
信封面不可同時寫姓名及囚號，郵遞過程會經太多人，怕有人玩嘢，寄不足郵費的信，令獄友需付費
4. 入相
請準備一啲相俾親友，掛住屋企人朋友貓仔狗仔時睇係會安心好多！
留意相嘅格式：一般2R/3R/4R OK！唔好入親友/同性別嘅單人照，係入唔到嘅！
入相只可以探訪時入，唔可以寄相入去，但可以將相印落信到當信寄入去
留意東頭懲教所嘅信件唔可以印相，會將信上嘅相都計落每個月入相嘅quota
5. 入名
所有探訪者都要先入名
還押期間每日探一次，每次15分鐘
判刑後每月探兩次，每次30分鐘，用完兩次普通探訪限額後可以申請兩次特別探（加探），只限親友家屬
可以入獄前預必記低親友中英全名，見福利官時入名
親友可以透過懲教熱線提供個人資料，福利官問準親友就會加名，程序需時3到5個工作天
未婚夫妻唔當親屬，不過一開始入名無供稱任何關係都不需要任何證明文件的
判刑後第二日探訪要入物資，所以入獄前千萬要記低所有要入嘅名，以便盡快收到物資
6. 私家飯
經濟許可的話請幫親友申請食私家飯（即指定茶餐廳供應嘅飯），好食好多的
已定罪親友係冇得食私飯，只有還押人士可以申請，裡面啲野係好難食！！！！
荔枝角私飯有3間，跟味道排名依次序為美孚冰室＞榮光冰室（於2020年12月27日後不再提供服務）＞星藝廚坊
私飯要還押人士向福利官申請，一般需要2至3日出批文，注意要揀埋餐廳
申請批文後告知親友，下次探望時去問職員出咗私飯批文未，批咗就拎走批文去私飯餐廳畀錢同揀餐
價錢由一星期每日早午晚3餐合共$1300到$1800不等，視乎菜式
還押人士可以飲酒，晚飯視乎需要可以加紅酒／白酒／啤酒（現時只限無酒精）
轉餐廳需要再向福利官申請批文
如果一直食同一間私飯唔需要額外批文，多數餐廳接受過數，唔洗每個星期去親身畀錢
食私飯期間要上庭可以預先同餐廳講聲，嗰餐唔落單／取消
如果食食下私飯過界可以向餐廳申請退款（未必順利，但係可以退的）
抗爭點滴 Stories of Resistance
圍牆支援手冊為在囚人士家屬及朋友提供一系列詳盡指南，包括探監物品、探監流程、探監規定、探監人數、懲教署認可交來物品、探監物資、各個懲教院所及監獄詳情等等。
Comments