iOS17 6大重點新功能、AMD 處理器連環燒、WhatsApp 支援多機登入｜廣東話【Price Weekly #164 2023年4月】

Price.com.hk 香港格價網 | 科技類 | May 8, 2023

此影片謄本由Stand with you製作

★非作商業用途，本檔案版權歸版權持有人獨有★

歡迎收看Price Weekly，我們一起看看今個星期最熱門的科技新聞。如果不想錯過我們的新片，就快點Subscribe Price youtube channel，再按旁邊的鐘。

距離 WWDC 仲有一個月多啲，有無全新 VR 裝置暫時仲未知，但係全新 iOS 17 就可以好肯定到時會同大家見面。我地而家就綜合現時流傳嘅新 OS 資料，睇吓有乜野新功能。首先就係銀包即係 Apple Wallet 上既改動，唔單止繼續支援銀行卡、keycard 同交通卡等，仲可以加入電子身份證、駕駛執照同埋電子登機證等等。其次就係提升尋找功能嘅準確度，如果配合埋 AirTags就可以更加容易追蹤到物件嘅位置。Apple亦都有回應用家嘅需求，同時會加強畀 AirTags 跟蹤嘅反制措施。而喺健康方面，就有指會結合目前嘅健康同行事曆，將運動同心律健康等等嘅資料整合，方便用家紀錄身體狀況。而 Always on Display 同埋動態島兩個功能都會增加更多嘅選項，畀更多空間用家去設定，最後亦都係最重要嘅就係所有 iOS 16 嘅 iPhone，都可以順利過渡去 iOS 17。究竟新 OS 仲有乜野玩呢？等多個月就有答案喇。

下載檔案

所有資料非作商業用途，若有內容侵權，請即通知我們移除。

靠住3D V-Cache成為最強遊戲處理器Ryzen 7000X3D 系列 CPU近日爆出燒 U 問題，從網民 Share 出嚟嘅相可以見到粒 7800X3D 嘅針腳同主機板個 socket 都燶咗一撻，睇嚟粒 U 連埋塊板都一齊燒咗。而同類事件亦都唔止一單，好似係高階啲嘅 7950X3D都有人燒咗，而且燶嘅位置仲幾乎一樣。雖然 AMD 仲未調查到事故嘅原因，但外界都認為
喺粒用家開咗 EXPO 功能之後，粒 CPU 嘅電壓設定過高所以先至會燒。而目前ASUS、MSI 幾個牌子都已經宣佈會幫旗下嘅主機板 Update BIOS，加入提升電壓嘅限制避免再有同類情況發生。而用緊 AMD CPU 嘅朋友
就記得盡快更新 BIOS 喇。

華碩喺今個月中發表咗新一代電競手機ROG Phone 7 系列，由外形、處理器、散熱系統
甚至乎 Ultimate 專用嘅外掛式散熱扇全部都有升級。我地之前都係度同大家介紹過新機嘅特點，不過大家最期待嘅相信都係佢嘅價錢。日前香港方面就公布咗售價喇，當中一共分左 2 個版本，價錢由 $7998 起，而頂級版16+512GB Ultimate 價錢係$10298。另外由即日開始至5月11號，仲有trade in回贈，最高可以有$500回收價。唔知大家對邊個版本最有興趣呢？歡迎留言話畀我哋知。

相信好多朋友都有用 WhatsApp 㗎喇，但 WhatsApp 一直以來只能夠用一部手機登入
為唔少用家詬病。不過日前佢地終於推出，跨手機共用帳號功能，方便用家喺唔同裝置上進行對話。但都只係仍然維持最多 4 部裝置登入。而呢 4 個裝置並唔可以同步連線，目前只係支援一部主機再加一部裝置連接，用法亦同以前一樣，要掃瞄手機上嘅 QR Code。Whatsapp 就話黎緊會再有新方法登入，用家只需要喺網頁版輸入電話號碼，就可以收取一次性密碼登錄，取代掃 QR Code
，方便用緊 Whatsapp Business 嘅中小企員工，可以用喺唔同裝置用同一個帳號回覆客人。

PS5 已經推出三年有多，按照傳統SONY 係時候推出 slim 版。早前已經傳出新版 PS5 會用更方正嘅造型，體積上略為縮水，亦採用低電壓配置令機身溫度更低。至於硬體規格上就無太大差別，不過機身就無光碟機，需要透過 USB-C 連接外置光碟機。有消息指 SONY 旗下嘅 SIE 索尼互動娛樂公司，上星期向美國專利局提交專利申請，雖然文件就未有提到PS5 相關字眼，但設計示意圖嘅光碟機樣式就同 PS5 用緊嘅幾似樣。專利新技術有助減低光碟轉動所產生嘅噪音。消息指光碟機除咗跟機之外亦可以單買，不過就唔支援現有嘅 PS5 啦。目前估計 SONY 極有可能會於今年六月喺美國舉行嘅 Summer Game Fest，夏日遊戲節開跑之前率先披露新機同遊戲陣容嘅資訊，有興趣嘅朋友記得留意。

唔知大家宜家仲有冇用電話亭呢？香港電訊最近就推出「智慧電話亭」先導計劃。喺銅鑼灣設置咗一座智慧電話亭，除咗可以打電話仲提供免費 WiFi、USB 充電，熒幕會顯示即時新聞、天氣同埋非牟利機構提供嘅社福資訊。傳統嘅電話亭只收硬幣，呢個智能電話亭就支援信用卡，同八達通等流動支付方式仲可以繳交帳單費用添。有份參與設計嘅職訓局同學仔就話，希望呢個電話亭可以加強社區聯繫，亦方便外地遊客查閱資訊。電訊公司會喺五月中喺中環設置第二座電話亭
，計劃到九月就完。電訊公司喺期間會收集公眾意見同埋評估電話亭使用情況，歡迎有用過嘅朋友同我地分享吓。

早兩日 B&O 發表全手提藍牙喇叭 Beosound A5採用鋁、木同編織纖維等等嘅物料，相當之有北歐感覺。機身具有 IP65 防水能力，單元部分5.25 吋低音、兩個 2 吋中音同埋一個 0.75 吋高音，總輸出達到 280W
，除咗可以做到 360 度環繞聲。仲有黎自同廠 Beolab 90 嘅波束成形技術，減低外來干擾。續航力方面，可以連續用到 12 個鐘，機面更有無線充電位，可以幫手機叉電，Beosound A5 分別有深啡色同淺啡色。

AI 人工智能大行其道由搜尋、對話、畫圖，甚至製作影片樣樣都可以搵 AI。日前外國有人就搵 AI 繪圖程式Midjourney 幫手，以「女生玩 PS5 很開心」作為主題，叫 Midjourney 露兩手，結果亦都無令人失望。幾張相都真係有齊用家想要既，女生、玩 PS5 同埋好開心呢幾種元素，不過就唔知點解個 PS5 手掣比正常既大好多，而且啲掣嘅擺位仲亂晒，令到好多網民都忍唔住笑。有網民就話可能係因為指令太過空泛，加上 Midjourney 對於手掣嘅資料唔夠齊全，所以出現呢種災難式圖片，唔知大家有無遇過呢種情況呢？。歡迎留言傾吓