11/3 《圍爐取戀》我哋個Ex 原來一腳踏五船

東方昇：但我都想問，即係女事主B你買花嘅地方同嗰個渣男買花嘅地方一樣？

事主B：係呀，無錯，其實係因為我哋未一齊之前，佢12月24號平安夜嗰日，其實有送過一紮花俾我嘅，向我表白咁樣送俾我，咁我就得知有呢間花店啦，就覺得佢啲花都幾靚。

Kneta：佢最癲呢係買開禮物都係同一間喎。痴線喎。

專家Disckson：係呀，仲要係一次過買三個一樣嘅。

東方昇：我懷疑呢，其實除咗你哋兩位之外，一定有好多受害者，我而家想逐一講出嚟，等觀眾呢對應吓自己男朋友，係咪有咁樣。

專家Dickson：首先、首先嗰紮花係咩花嚟先？

盤點渣男行徑（一）：訂購的花束是一樣嗎？

東方昇：係咪幾紮花都一樣先？

事主A：Er 花店就冇特別同我講。（花店沒有交代）

東方昇：哦~好，得！嗰間花店喺邊一區先？係咪花墟先？

盤點渣男行徑（二）：花店所在地是？

事主A：唔喺花墟。

Kneta：尖沙咀嗰啲吓嘛？

東方昇：不是花墟，OKOK，好。（不是花墟）

東方昇：好，跟住嗱，你話禮物一樣，起碼你哋事主A事主B禮物一樣啦，係乜嘢禮物先？

盤點渣男行徑（三）：定情信物是？

事主A：Er 啱啱一齊咗confirm，跟住佢就送咗一個ikea嘅狗嘅公仔俾我。

東方昇：哦，ikea嗰隻狗，99蚊嗰隻丫嘛！

Kneta：係啊。

專家Dickson：因為呢啲可以一次過買一打嘛。

叻叻：好Cheap啊！

Kneta：我仲以為咁勁買iPhone幾部呀。

東方昇：即事主A事主B都係收呢隻狗？

事主B：係喇，我都係收到同一份囉，一模一樣囉。

東方昇：嗯......

叻叻：咁會去啲咩地方呀？

盤點渣男行徑（四）：常去的約會地點是？

事主A：我平時候同佢如果揸車嘅話，就可能去青衣嗰個昂船洲大橋呀，又或者係得閒冇嘢做去屯赤（隧道）咁樣囉。即我哋通常去就係去呢啲地方。

東方昇：都係難撞到熟人，即係浪漫鹹濕勝地。

Kneta：係呀，即基本上唔想俾人知嗰啲呢，都係去嗰度嘅，即偷情嗰啲都係會去嗰度。

東方昇：你去過呀？

Kneta：唔係，我知道有呀，多數都係去嗰個......

事主A：同埋去西九（文化區）囉咁樣。

東方昇：嗯......

專家Dickson：係咪事主A同B都係去過呢啲地方呀？

事主B：冇錯。

東方昇：嘩......

叻叻：呢啲地方仲有個共同特徵，就係......

Kneta：唔使錢。

叻叻：係呀，低成本。

Kneta：低消費......

東方昇：係咪成日有啲大話都似，例如係咪話職業嗰啲都呃你哋㗎？

盤點渣男行徑（五）：有隱瞞自身職業嗎？

事主A：係呀係呀。嗰陣時啱啱同佢一齊啦，咁佢就同我講佢返緊一份關於alarm service嘅工嚟嘅，咁跟住佢就要返shift嘅，咁所以就好多OT，同埋啲時間好唔定時。


專家Dickson：嗯，係。

事主A：咁跟住去到22年年尾啦，咁佢就轉咗一份工，咁就話喺機場嗰邊返工嘅，咁返九五就會好啲囉咁樣。

東方昇：咦，咁佢同事主B講佢係返咩工呢？

事主B：佢話佢係喺機場嗰邊返工嘅，返做建築。

東方昇：咁你有冇find out，其實佢呢份工係真定假呢？

事主B：我嗰陣時冇諗咁多，覺得應該係真嘅，因為佢話咩好忙呀，要OT呀，要畫圖呀，又要開會呀，成team人一
齊OT，咁我都冇諗咁多，即係都係信佢。

東方昇：嗯......

叻叻：咁究竟佢實際職業係咩呢？邊個先係真呢？

事主A：實際職業呢就係有一次，我就喺佢屋企唔小心就睇到佢有一張，紀律部隊嘅職員證。

眾人：哦......

專家Dickson：呢個就係佢真實嘅身份啦。

事主A：係喇，咁但係我嗰陣時都冇即刻拆穿佢嘅，咁我覺得係佢唔同我講，某程度上我覺得佢可能自卑，定係佢自己都，唔想人哋知佢返呢份工呀。

東方昇：哦......或者嗰個紀律部隊嘅身份特殊啲。

事主A：係咁咁樣。

東方昇：哦，其實就方便佢講大話，總之嗰份工一定狂OT啦，，總之你隨時可以消失咁樣嘅。
（訛稱職業方便時間管理）

事主A：係呀係呀。

東方昇：嗱，我想問一問喇。嗱，佢一腳踏幾船啦，你哋覺得佢係咩心理呢？即係嗱，真心佢係為咗性而一腳踏幾船丫？定你覺得佢係有感情嘅投入呢？

事主A：我覺得佢好貪心個人，即我覺得如果你真係想要發生關係嘅，咁你會當係SP㗎嘛，或者其他關係啦，但係你係每一個都要當係女朋友，我覺得佢係享受緊每個人去愛佢呀，而佢係唔使付出囉，即係，我覺得佢極度貪心啦，同埋有啲病態囉。

事主A認為：渣男貪心又不付出 享受被人愛

東方昇：咁我想問喇，你哋而家同嗰個男仔嘅關係係點樣呢？

事主A：我嗰日同佢講咗分手之後，跟住嗰日當日呢，佢仲要wtsapp我同我講話：「多謝你一直以嚟嘅付出」。

東方昇：付佢老味呀，真係痴線，你已經篤穿佢係一腳踏幾船啦嘛，佢仲要咁樣。

事主A：係呀，但佢由頭到尾佢都冇認過錯其實，即係冇承認呢一件事。（被揭穿後死不悔過）

東方昇：，咁事主B而家同佢點呢個關係？

事主B：而家就係，其實應該係未斬纜囉，即之前問佢究竟想點呢？跟住，但係佢又逃避囉，即佢唔繼續覆我囉，佢消失咗。

東方昇：即佢其實一路都消失㗎喇（出事後立即潛水）。

事主B：就係當事主A發生咗嗰樣嘢，跟住佢問我，跟住佢應該係知道囉，跟住佢就叫我唔好再同人講喇。

東方昇：我覺得佢好PK，佢其實知道佢有好多個受害者，所以甚至乎你拆穿咗佢呢，佢都要安撫你，即佢驚。（事後安撫避免再次東窗事發）。

叻叻：因為影響佢之後嗰啲。

東方昇：係呀，之後佢仲有好多個。

Kneta：同埋佢唔明確哋認啦，因為你入佢唔到嘛，佢唔認囉，我又道歉，可能大家誤會咗，佢一路唔講一路走咗去，咁咪得囉。

東方昇：所以真係好PK呢個，仲要係好專業呀。

Kneta：嗯......

東方昇：即我覺得作為女仔都好難拆穿。

專家Dickson：我直情覺得佢係一個騙子。（騙子無誤）

東方昇：係啊。

專家Dickson：唔知呃緊啲乜嘢。

東方昇：所以你哋打上嚟希望警世。

事主A：係，即係完全冇諗過會發生喺自己身上囉，但其實你咁真心對一個人，即你唔會諗到佢係咁樣對你㗎嘛。

東方昇：嗯......

事主A：但係我覺得即係自己要喺該懷疑嘅時候，有問題就要raise出嚟囉，我自己都好似，因為愛情係盲目嘅，咁樣我就好似睇唔到一樣嘢咁樣。（事主A自我檢討......）

專家Dickson：但你哋已經算好好，因為你哋叫做知道咗個情況之後呢，你都即刻去面對同埋應對啦而冇再呃你自己。
（Dickson認為：即時面對勇氣可嘉）

東方昇：係呀係呀。

事主A：希望大家身邊如果有咁嘅男仔，大家都打醒12分精神。

東方昇：所以真心我喺度呼籲情人節嗰日佢乜嘢......只要佢正日唔係陪住你......

Kneta：就有輘輷喇。

東方昇：就屈佢就得㗎喇。

眾人：（笑）

東方昇：多謝你地嘅分享啦。

事主A&B：拜拜......

眾人：好~拜拜......

叻叻：其實呢，我都理解而家後生呢......

東方昇：你都好後生啫。

Kneta：我都好後生㗎！

叻叻：所以我咪理解囉。

東方昇：係係係，即係點呢？

叻叻：我哋而家認識新朋友，成日喺嗰啲交友APP嗰度認識呢，咁所以你要了解對方嘅背景係比較難啲嘅，即係比較模糊啲，所以我哋應該要拖長少少個觀察期去認識一個新嘅朋友。
叻叻建議：用交友App宜拖長觀察期

Kneta：係呀，即好似啱先個case咁呢，其實蝕底個位就係因為事主就唔夠深入哋了解另一半，永遠就stay咗喺一個「蛋白區」。

東方昇：外圍區。

Kneta：係喇外圍，即白食白做乜都唔知，你連最簡單佢嘅朋友呀、屋企人連同事，或者最緊要嘅紀念日呀，特別日子呢，佢都可以一個藉口，就可以耍走，你又唔質疑，其實呢啲位好蝕底，我覺得呢幾點，一定要去捉住囉，如果唔係，真係比人呃咗呢，都唔會知囉。
Kneta提醒：要突破外圍 了解對方人際關係

東方昇：同埋喺個曖昧期呢，可以多啲電話突擊打俾佢。
東方昇建議：曖昧期多用電話突擊。

Kneta：係呀，facetime佢。

東方昇：係呀佢溝緊你，你有權咁做，多幾次呢，如果佢真係有另一半呢，其實佢會穿煲。

專家Dickson：我係嚴重要打擊呢啲人呀！

東方昇：係係係。

專家Dickson：因為佢係嚴重破壞社會分配平衡呀！

眾人：（笑）

Kneta：我終於知點解Dickson冇喇。

專家Dickson：哎，真係，哎......有人食多咗。

東方昇：真係貧富懸殊呀。

專家Dickson：哎，無辦法。

Kneta：大家照顧自己。

東方昇：係呀......咁同埋大家如果有咩經歷，就同我哋分享。咁等我哋再公開嗰啲渣男嘅手段，令到大家又有免疫力啦，好，差唔多時間，拜拜。