1

【奇案調查】雨夜屠夫林過雲,是否真的每次行動也是下雨天?每次行動都要拍攝下來?

解密工作室 | 娛樂類 | Jul 4, 2021

此影片謄本由珍珠鮮奶綠&港女製作

大家好歡迎嚟到解密工作室,我係探員X。相信大家對雨夜屠夫林過雲呢個名一啲都唔陌生,但大家對當中案情嘅細節,唔一定十分了解。今日探員X就同你地一齊,抽絲剝繭香港首個連環變態殺手林過雲嘅成魔之路。佢點樣由一個冷氣學徒,變成一名非禮狂魔。佢喺非禮之後,又係點樣逃避法律嘅制裁,直接跳過審訊同監禁,只係被判入精神病院,接受102日嘅治療。喺離開精神病院之後,林過雲點樣改名換姓,成為一名的士司機,尋找佢嘅獵物、實驗對象,成為一個惡名遠播嘅變態殺手。探員X亦會同大家探討一下,到底坊間流傳,林過雲係咪真係下雨天先行兇?佢喺幾百尺嘅單位裏邊,先後對四名女性進行肢解。佢嘅爸爸同佢細佬,到底係咪唔知情同冇參與?而最後一名受害人,一個17歲嘅應屆會考生,又係點樣參加完謝師宴之後,登上嗰一個架死亡的士?

自1959年起香港人口急劇增加,香港市區人口多,居住環境十分擠迫。所以當時港英政府大力推動新市鎮嘅發展,以解決呢啲問題,而當時沙田區係重點發展嘅新市鎮之一。從1959年到1980年,沙田區新市鎮已經發展得頗為完善。但由於當時沙田區被城門河分隔成了兩個部份,所以政府就逐步喺城門河上興建橋樑,接駁沙田區兩個部份。

喺1982年2月11日,一名金門建築公司工人,朝早九點佢如常返到沙田城門河開工。呢名工人嘅主要職責,就係睇吓城門河上有冇垃圾異物。當佢行到大約依家瀝源橋附近,突然發現城門河中飄浮住一個像真度極高嘅玩具公仔頭。於是佢就利用一個鐵鉤,將公仔頭打撈上嚟。當呢一名工人將個頭拎到眼前一睇,竟然發現這並不是什麼玩具公仔頭,而係一個真實嘅女性人頭。呢一名女性人頭,上門牙裝有三隻假牙,耳環係圓形嘅金耳環,電短頭髮,但有部份頭髮已經脫落,皮膚亦開始變白,似乎已經浸左喺水好多日,而頭部切口亦相當整齊。呢名工人見到咁恐怖嘅人頭之後,當然立即報警尋求協助。

警方接報到場之後大為緊張,認為呢單係謀殺肢解案。但係搵出兇手之前,更重要嘅係確認死者身份。但因為當時只有受害人嘅頭部,而且相信已經被棄於城門河多日,頭部嚴重發脹,較難辨認死者身份。於是警方就只能從死者其他殘肢着手,睇吓會唔會有啲乜嘢線索或特徵,可以確認到死者身份。但當時警方亦唔抱有乜嘢希望,因為最能夠提供到線索嘅頭部,亦為佢哋帶嚟唔到乜嘢頭緒。但警方亦唔能放過任何希望,所以就開始喺城門河覺個位置進行打撈。經過一番努力之下,成功喺距離發現頭部100米位置,亦即係沙田市中心對出,搵到雙腳嘅殘肢。 喺富豪花園對出位置,亦即係約距離頭部700米嘅地方,搵到雙手嘅殘肢。而當中嘅軀體,就係距離頭部大約半公里嘅位置被發現。初步確認所有殘肢來自同一人,呢一名受害人係一名年約30至50歲嘅中年女性。

雖然如警方預料一樣,所有殘肢已經嚴重發脹較難辨認,但竟然喺死者手上,竟然發現一個好重要嘅線索,原來死者右臂上有一個紋身,紋身係一個心形,心形上插着一把刀,有一隻燕子圍着心形轉。於是警方就立刻將受害人嘅特徵公開,呼籲市民提供有用嘅線索。

果然,喺警方公布冇幾耐之後,就有一名老年男子及一名中年男子去到警署,指佢哋知道城門河肢解案嘅死者係邊個。老年男人就話,佢個女因為唔滿意自己嘅哨牙,所以早前就拔走三隻門牙,裝上三隻假牙以改善哨牙問題。而且佢個女嘅右手手臂,亦都同受害人一樣,有一個燕子同心形嘅紋身。所以佢哋相信死者就係佢哋嘅女同老婆。最後經過認屍後,確認死者果然係佢哋嘅親人。

死者名為陳鳳蘭,案發時22歲,已婚、育有兩名女兒,喺香賓大廈地庫大華夜總會任職「媽媽生」。喺1982年2月3日,即發現屍體前八日已經失蹤。警方根據陳鳳蘭嘅爸爸同老公嘅口供,得出兩個調查方向:第一,欠債。陳鳳蘭老公為油麻地一帶嘅活躍人士,曾經喺地下賭檔工作。喺陳鳳蘭死之前,曾經係一間酒吧工作,並問酒吧借咗$500糧,其後被酒吧追債。第二,桃色糾紛。陳鳳蘭生前喺夜總會工作時,有一名名為四眼仔嘅男人,對佢進行熱烈嘅追求,不時開住平治房車接送死者上下班。死者嘅老公得知呢件事之後,曾經約四眼仔出嚟傾過。傾談期間,四眼仔曾經提出要求死者老公讓妻。於是警方就循債務及桃色糾紛兩方面着手調查,而調查重點亦係最後見到死者陳鳳蘭嘅人。

下載檔案

下載檔案

1

1

營運經費相當貧乏,敬請體諒我們投放少量Google Ads!

1

據警方了解,陳鳳蘭喺失蹤前一日,即係2月2日,係需要到夜總會返工。直到2月3日嘅凌晨,陳鳳蘭嘅同事指,佢哋喺凌晨收工之後,同死者去附近一間餐廳食宵夜飲酒傾偈。期間唔知陳鳳蘭係咪受感情影響,要喺老公同四眼仔之間作出選擇,所以飲咗大量烈酒。陳鳳蘭受酒精影響,導致語無倫次、神志不清。當時陳鳳蘭同幾位同事飲飽食醉之後,大家就搭的士返屋企。但由於陳鳳蘭當時十分醉,所以大家先幫佢搵咗一架的士返屋企。過咗一陣,佢哋目送陳鳳蘭上咗一架的士,更加坐咗喺車頭,喺司機旁邊,所以就放心將佢交俾司機。但係嗰日之後,陳鳳蘭嘅同事,就再冇見到佢去夜總會返工。而陳鳳蘭老公亦同警方講,佢嗰日之後就冇返過屋企。

一時間,呢單城門河夜總會女肢解案成為社會熱話。大家都討論,係邊個要對陳鳳蘭狠下毒手?係咪佢老公嘅仇家?定係佢嘅情人四眼仔?定係其實當日佢有返到屋企,佢老公因為佢紅杏出牆,所以引起殺機?定係嗰個載佢返屋企嘅的士司機?

警方根據以上僅有嘅線索,分別對陳鳳蘭身邊可疑嘅人士進行調查,包括佢老公、佢嘅情人四眼仔,甚至佢老公嘅仇家,但都冇證據顯示佢哋同事件有關。所以警方懷疑,兇手有可能真係嗰個的士司機,於是呼籲社會大眾提供有關嗰架的士嘅線索。但可惜案發當時已經係凌晨四點幾,街上已經冇乜人,所以冇人提供到有用嘅線索。而最有希望嘅陳鳳蘭同事,亦因為當日飲咗好多酒,對嗰架的士同的士司機都冇乜印象。

一時間警方苦無對策,而且社會大眾亦因為呢單案件,盡量開始改搭其他公共交通工具。喺之後幾個月,亦有三位女性,喺凌晨時分收工之後離奇失蹤。分別係1982年5月29日,一名康樂中心收銀員陳雲潔。佢於清晨六點收工後,有同事見到佢登上一架的士離去,之後就再冇見過佢。以及喺1982年6月17日,一名清潔工人梁秀雲,喺凌晨四點收工後,亦都係乘坐一架的士離去後不知所終。係1982年7月2日,一個啱啱參加完謝師宴嘅17歲應屆女會考生梁惠心,同樣都係乘坐一架的士後人間蒸發。當時社會籠罩住一個恐怖氣氛,大家如果冇必要真係唔會坐的士。亦有報道指,曾經有女乘客坐的士期間,突然懷疑司機就係肢解陳鳳蘭嘅嗰位兇手,所以突然開門跳車逃亡,當然嗰位司機唔係真正兇手。可想而知,當時呢件事引起幾大恐慌。而且警方對於呢宗案件、呢個的士司機,完全冇任何頭緒。

直到1982年8月17日,呢個恐怖陰霾,因為一間沖曬店而被撥開。喺8月10日一間位於旺角嘅沖曬店,收到來自尖沙咀分店嘅要求,要求佢哋幫忙處理當日尖沙咀店部份沖曬照片嘅訂單,因為尖沙咀分店有部份沖曬照片嘅設備出現咗故障。當旺角分店收到指示之後,亦不以為意,因為設備損壞不時發生,於是幫尖沙咀分店處理訂單。但當旺角分店一名技術人員處理其中一張訂單時,發現相片內容似乎係一啲人體嘅殘肢,認為照片不太尋常,於是旺角分店就決定報警求助。當警方接報後,便向尖沙咀分店職員查問前來曬相嘅人係邊個。尖沙咀分店職員張志立就話,前來曬相嘅人係佢攝影會嘅朋友,佢喺殮房兼任攝影師,為法醫影低解剖嘅相片。但係當警方聽到呢個說法之後,認為唔太可信,於是就喺旺角分店等待嗰位客人嚟攞相嘅時候,一問究竟。當時警方為咗進一步確認,仲特登喺嗰堆相入面,加入唔同嘅照片,睇吓個客人攞相嘅時候,會唔會將唔屬於佢嘅相拎出嚟。

到咗8月17日夜晚6:55,警方等咗一日,嗰個客人終於去到旺角分店攞相。客人係一名年約20至30歲嘅男性,佢攞相嘅時候,仲專登喺沖曬店檢查相片,果然佢真係將唔屬於佢嘅相拎出嚟。警方立即問佢,呢啲相係喺邊度影。嗰位男子話,我係受一名名為四眼佬、任職東方日報嘅職員所托,幫佢沖印同攞相。於是警方就叫呢名男子,帶佢哋去東方日報搵出四眼佬。但去到位於土瓜灣嘅東方日報時,裏面並冇四眼佬呢個人,相信只係被捕男子虛構出嚟嘅人物。咁到底呢啲相係點樣影返嚟?係咪真係殮房攝影師所影嘅?定係被捕男子有一啲不可告人嘅秘密?

1

1

當警方知道冇四眼佬呢個人之後,就即刻向法庭申請搜查令,要求去到被保人位於土瓜灣貴州街安興大廈2樓F室嘅住所,進行深入嘅調查同搜證。到咗夜晚10點,終於成功申請到搜查令,警員就立即進入被捕人嘅處所。被保人單位有三間睡房,一間係被捕人同細佬同住,佢哋分上下格床,被捕人瞓吓格床,佢細佬瞓上格床。另一間睡房係被保人父親所住,剩返一間就係被捕人妹妹所住。除咗三間睡房之外,單位內有兩個廳、一個廚房、一個浴室。在場警員先喺單位內到處查看,當佢哋查看一番之後就已經知道呢單案件唔係普通案件。首先,佢哋發現大量關於解剖嘅書籍,以及解剖需要用到嘅工具,包括手術刀、剪刀等等。而係被捕人房間嘅一個櫃入面,搵到令在場每個警員都大為震驚嘅嘢,佢哋發現大量人體器官標本,包括六個乳房及生殖器官等等。佢哋被放喺玻璃樽入面,而且用藥水浸泡,相信受害人最少有三個。而警方喺單位裏面,亦發現一個大型鐵箱,鐵箱入面裝住女性衣物同高踭鞋,同時亦放着大批相片。相片包括女性器官嘅大特寫,相中人嘅手同腳被繩捆綁,雖然照片皆冇受害人嘅樣貌,或者樣貌被雜誌遮住。但係有部份照片顯示,其中一個受害人嘅右手手臂,有被一把刀插住嘅心形紋身。

其中一個受害人嘅右臂有一個被一把刀插住的心形紋身,而且有一隻燕子圍住心形轉。雖然在場調查的警員是隸屬於旺角區,但係佢哋都知眼前呢單案件似乎係同六個月之前沙田城門河肢解案有關,單位搜出照片中受害人身上嘅紋身同沙田城門河肢解案死者手上嘅紋身,無論係圖案或者位置正正係一樣嘅。

正當在場警員興奮住破到一單大案嘅時候,佢哋喺紙箱入邊搵到一張女性嘅身分證上面寫着三個字-梁惠心。
呢個名就係一個月之前參加完謝師宴之後離奇失蹤嗰名女性,警方呢個時候相信呢個正值花季嘅少女已經慘遭殺害。同時,喺鐵箱裏面亦都發現四十幾盒錄影帶,其中三盒錄影帶寫有專屬嘅名字包括:嚴肅嘅秘密、雨夜行動、第四次行動。於是警方就檢走以上嘅證物返警署查看當中嘅內容,係呢刻警方亦都正式拘捕眼前呢個男人,而呢個男人就係林過雲。一個係之後每一個香港人都熟悉嘅名。

我哋先了解一下林過雲呢個人,林過雲原名林國裕,被捕時只有廿七歲,任職夜更的士司機,車牌係BR2212,係一名攝影愛好者。據聞林過雲童年過得非常之不愉快,林過雲嘅生母同父親離婚之後,由父親養育成人,父親之後亦都有兩段婚姻。喺林過雲未到兩歲嘅時候曾經因為大喊嘈醒左爸爸而被掌摑,而且一有小事爸爸就會對佢責罵同埋毒打。

喺林過雲成年之後同家人嘅關係亦都十分疏離,佢哋一家少有溝通,林過雲返到屋企之後一般都係匿埋喺房裏面。佢曾經做過冷氣學徒,亦都試過喺佢爸爸嘅電單車舖工作。係1973年即係佢18歲嗰年,曾經用刀挾持過一名女性到公廁裏面對佢進行侵犯其後被捕,但係當時精神科醫生指林過雲精神方面有問題唔適宜受審或者判可監,所以當時林過雲只係被判入青山精神病院接受治療。接受咗一百幾日嘅治療之後就獲准出院,出院之後就由原名嘅林國裕改名為林友強。

係五年之後即1978年,林過雲就考取咗的士司機牌並由林友強改名為林過雲。係1980年林過雲轉為夜更的士司機,1981年林過雲對攝影產生濃厚興趣,參加咗由女青年會舉辦嘅成人興趣攝影課程,當讀完呢個課程之後,有時會同啲同班同學夾錢請裸體模特兒比佢哋影裸照。1982年起,香港就出現咗最少四宗夜歸女性坐的士返屋企之後失蹤嘅案件。

喺林過雲被捕之後,原來警方都將林過雲嘅弟弟同爸爸拘捕,因為佢哋認為佢哋所住嘅單位只有幾百呎,林過雲藏屍係屋企裏邊無理由唔知道,特別係林過雲嘅弟弟。佢同林過雲住同一間房,當中嘅標本亦都係床喺佢哋間房裏面嘅一個櫃內,於是警方就開始對林過雲進行問話。

1

1

首先警方最關心嘅係失蹤咗一個幾月嘅應屆會考生梁惠心嘅去向,因為基本上可以肯定梁惠心嘅失蹤係同林過雲有關,因為梁慧心嘅身分證正正係林過雲屋企裏面搵到。林過雲對此就解釋梁惠心嘅身分證喺七月初嘅時候喺的士後座搵到一直都想交返去警署,但係一直唔記得咗。於是警方就再次問林過雲,咁喺你屋企搜出嘅相片同埋你拎去沖曬嘅相片係咩一回事。林過雲就話大約係半年前,佢喺攝影展上面認識咗一個美籍華人,嗰個美籍華人係一個醫生同埋解剖學家,而最近嗰個美籍華人返左美國,佢喺離開之前將佢嘅攝影器材送咗比林過雲,並且托林過雲幫佢保管一啲物品,例如嗰啲標本同埋喺林過雲屋企搜出嗰個鐵箱裏面嘅物品。

於是警方將盤問對象轉為林過雲嘅爸爸同埋細佬,佢哋指對屋企嘅物品毫不知情。於是警方就將重點轉到檢返黎嘅證物裏面,警方逐一觀看點返嚟嘅錄影帶,當中有一啲內容係無關痛癢既。

直到警方觀看嗰三盒寫咗名嘅錄影帶,呢三盒錄影帶拍攝嘅地點相信就係林過雲嘅房間。而嚴肅的秘密呢盒錄影帶相信係嗰三盒錄影帶嘅第一部,影片中顯示林過雲利用手術刀對影片中嘅女性進行解剖但明顯地林過雲唔識解剖,而且顯得手忙腳亂。雖然整個影片內容十分變態,但整個過程林過雲都無對屍體進行性侵。

另一條影片雨夜行動,相信應該係第二條嘅影片,同上一段嚴肅的秘密無太大分別,但林過雲當時嘅解剖技術明顯比之前進步。

到最後一條影片第四次行動,影片中嘅受害人就係之前失蹤嘅應屆會考生梁慧心,但係呢一次林過雲嘅解剖技術亦都比上兩次好,而今次同上兩次唔同嘅係今次林過雲係有對死者進行侵犯。三條影片中林過雲都有保留每一個受害人嘅一些器官,將佢哋放喺一啲防腐嘅藥水中。而整個過程林過雲係將錄影機放喺碌架床嘅上格拍攝,每條影片都顯示林過雲會爬上爬落,估計係確保錄影機正常運作或者係要以唔同嘅角度欣賞佢自己嘅傑作,而係每條影片中亦不時會有閃光燈喺度閃,相信林過雲係為每一位死者拍照。

而呢啲影片從頭到尾都只有林過雲一個人,警方於是排除左林過雲爸爸同埋細佬嘅嫌疑,雖然林過雲一開始矢口否認殺人,但面對住錄影帶嘅內容佢唔可以再狡辯,於是警方再次問佢受害人嘅殘肢到底係邊,但林過雲到咗呢刻依然口硬,唔配合警方嘅問話,於是警方就只可以將佢送去精神病院,等精神科醫生同埋心理學家進行評估同埋問話。最後喺五個專家嘅誘導下,林過雲終於承認喺過往嘅半年間曾經殺害四名女性。

林過雲交代指第一名女性喺沙田城門河被發現嘅夜總會媽媽生陳鳳蘭。喺2月3號凌晨陳過雲接載左神智唔清醒嘅陳鳳蘭,嗰日林過雲已經將陳鳳蘭送到去目的地,但係陳鳳蘭到達左之後仍然未洒醒。於是林過雲決定將陳鳳蘭帶返土瓜灣嘅住所,林過雲首先返到屋企裏邊攞一條電線,然後再返到去車上將陳鳳蘭勒死,之後再將陳鳳蘭條屍體搬返屋企裏面收埋咗喺客廳嘅梳化底。直到第二日屋企所有人離開之後再將陳鳳蘭拖出來進行肢解,然後再用報紙包住所有殘肢。到咗夜晚開的士嘅時候,再將殘肢棄於火炭山邊,但估計因為當日落雨所以將陳鳳蘭嘅殘肢沖到沙田城門河。

林過雲指因為陳鳳蘭係歡場女子,佢覺得好嬲所以先對佢狠下毒手,探員X相信佢所指嘅憤怒係因為覺得陳鳳蘭唔潔身自愛,飲到爛醉如泥。而痛恨呢啲歡場女子嘅真正原因係因為佢經常喺尖沙咀呢個龍蛇混集之地接送客人,林過雲係揸夜更的士所以尖沙咀歡場同埋夜場多數都係佢嘅熟客。林過雲睇盡呢啲歡場小姐糜爛嘅生活,今日呢個小姐抱住一個老闆話愛到要生要死,聽日同一個小姐就抱住另一個老闆喺車裏面打得火熱,再加上童年父親有三段婚姻三個唔同嘅女人,所以痛恨女性而殺害第二同第三個受害人,林過雲亦都因為誤會佢哋係歡場女人所以重施故技。喺凌晨開的士期間除咗痛恨歡場女人之外,亦都對殺人同解剖上癮。

而第二同第三名受害人嘅殘肢,林過雲就選擇棄置於銅鑼灣大坑道山坡嘅草叢。到咗第四名受害人應屆會考生梁惠心既時候,林過雲已經開始對殺人同解剖厭倦。喺梁惠心遇害當日,林過雲係一間酒店外面接載左啱啱參加完謝師宴嘅梁惠心,佢首先用手扣將受害人扣住然後再同梁惠心喺車裏面傾偈,佢哋傾到學校、家庭、宗教、前途同埋靈魂等等嘅議題,大約傾咗三個鐘之後林過雲先用電線將梁惠心勒死。

對於殺害頭三名女性,佢覺得係替天行道。但至於梁惠心,林過雲指佢都唔知點解自己會對佢落手,或者佢根本唔想殺害梁惠心。但對於梁惠心屍體嘅下落,林過雲就一直無同警方供出。

而五位幫林過雲治療過嘅精神科專家裏面,有三位認為林過雲根本就無精神病,犯案只係為咗滿足佢唔正常嘅需求,亦有專家認為林過雲智商好高可能係故意講大話誤導專家。林過雲亦都向其中一名專家查詢點樣先可以免判死刑、點樣先可以唔使再出庭作供。

1

1

最後,林過雲係被捕後七個月之後,即係1983年3月3號,呢單轟動全港甚至轟動全球嘅香港首宗連環殺手案終於喺高等法院開審。但由於受害人全部均為女性,而且犯案手法兇殘,年紀最細嘅只有17歲,所以當時無挑選女陪審員。因為擔心女陪審員會因為相同性別而影響呢一單案件嘅公正性。所以係挑選陪審時,控辯雙方都同意只係挑選男性陪審員。由於案件十分分轟動,當時引來大批市民到庭聽審。

當時林過雲被控四項謀殺罪,分別殺害四名17至31歲嘅女性,但據聞當時警方懷疑受害人唔止四個,因為林過雲屋企有一個月曆,月曆部份日子被林過雲打上記號。當警方問林過雲點解要記低呢啲日子嘅時候,林過雲就回答:「每當我做大事嘅時候都要記低落嚟。」當時喺月曆上被打上記號嘅日子就唔止四個而係有十幾日被打上記號,而且喺嗰半年間突然人間蒸發嘅女子就唔止四個人,但由於警方當時無足夠嘅證據,所以就只係控告林過雲四項謀殺罪。

而林過雲喺庭上作答嘅時候,一直冷靜面無表情,唯獨當時控辯雙方問到關於第四位受害人梁惠心,林過雲作答時多次落淚。而雨夜屠夫呢個名亦都係林過雲自己提出來,當時有報章描述林過雲係香港屠夫,但林過雲就唔願意接受呢個稱號,指自己行兇時雖然唔係每次都落雨,但大部份時間都係。

最後經歷時二十日嘅審訊後,係1983年4月8號,七名男性嘅陪審員經過三小時既商討之後,一致裁定林過雲四項謀殺罪名成立。法官依例判處林過雲死刑,坐喺犯人欄嘅林過雲聽到之後面不改容,而代表林過雲嘅律師本來打算為佢上訴,但係林過雲當時已經無意上訴。林過雲嘅父親亦都拒絕咗律師嘅建議,認為林過雲係罪有應得,無謂浪費納稅人嘅錢。

值得一提嘅係,傳聞警方喺林過雲屋企找到一份超過一萬字嘅手稿,內容係講述倫敦惡名遠播嘅連環殺手,開膛手傑克。有傳言認為林過雲係仿效開膛手傑克,首先開膛手傑克係一名馬車拉夫,而林過雲就係一個的士司機。開膛手傑克多數係大霧嘅夜晚行兇,而林過雲大多數喺雨夜行兇。但當然呢個講法係真係假就不得而知。

但時至今日,林過雲帶俾我哋嘅陰霾依然揮之不去。有部份香港女性仍然十分抗拒搭的士,驚自己會遇上下一個林過雲,或者成為下一個梁惠心。

探員X想藉此呼籲大家珍惜眼前人,呢句說話好似好老土。但係你唔可以確保你或者你嘅家人會唔會遇上變態。珍惜每一刻同你相處嘅時間,想擁抱想告白想親吻嘅時候就唔好等聽日,唔好成日以為聽日係理所當然嘅。將每一天都當作最後一天!人生變幻無常愛需及時!

1

IMG_1410.PNG

在囚手足能夠接觸外間資訊的渠道寥寥可數,Youtube 機頂盒為每星期從 Youtube 上挑選不同種類的專題影片並製作成謄本、印刷成信件並寄到在囚手足手上的長期計劃。

你唔需要使用真實身份同披露自己地址就可以同手足做筆友喇!

立即登記成為筆友啦!話俾在囚手足知我哋無忘記佢!

其他最新謄本

https-::www.youtube.com:watch?v=TSJwMZvw

#227 超過28類魚種,集郵好去處 | 香港釣魚 | 艇釣 | 布袋澳

Handline Fishing手絲釣魚 | 娛樂類

https-::www.youtube.com:watch?v=TSJwMZvw

#226 3個人陪2個人釣魚 | 根叔 | 香港釣魚 | 艇釣 | 維港

Handline Fishing手絲釣魚 | 娛樂類

https-::www.youtube.com:watch?v=TSJwMZvw

試映劇場《係咁先啦》|試當真

試當真Trial & Error | 娛樂類

https-::www.youtube.com:watch?v=TSJwMZvw

試映劇場《老喵之報恩》|試當真

試當真Trial & Error | 娛樂類

https-::www.youtube.com:watch?v=TSJwMZvw

【東京奧運】🏆奧運的幾種人🏅香港運動員勁呀!🇭🇰|Pomato 小薯茄

Pomato 小薯茄 | 娛樂類

0