1

14/5《圍爐取戀》- 如果我有BNO會唔會跟我一齊走

毛記電視 | 娛樂類 | May 16, 2021

此影片謄本由hinyc製作

東方昇:即係你有多張船飛,佢都唔跟你走喇喎?
Ronald: 咁船飛大家自己拎返嚟嘅~ (眾人笑)
利君牙(笑罵、拍打東方昇): 人哋講認真嘢啊,你可唔可以唔好煩?
///
阿tom: 咁我就相反嘅,咁我上年啦,咁就人哋千里送鵝毛,我就千里送菊咁樣啦。
東方昇(插嘴): 飛鴨下話? (Kneta、利君牙笑著拍打東方昇)
阿tom(無奈): 我唔係鴨囉X! 我係雞! 我係雞!!! Okay?

---過場---
(展示圍爐取戀logo)
(身處粉色房間,眾人坐在淺綠色方桌前揮手,桌上正中央有張A4 size印上火爐照片的白紙)
眾人: 大家好~
旁白: 大家都知道呢兩年笠笠亂啦,有冇人諗過要移民嘅?
(配上叮叮叮叮聲效,利君牙、Kneta、阿tom、東方昇一秒內陸續舉手)
東方昇: 有嘅, (利君牙: 諗實諗過架) 全香港人都有諗過㗎喇。諗下囉~ 都要諗㗎~
(只有專家Dickson沒舉手,沉默地坐在桌前,眾人狐疑的眼神看著他,螢幕飄出一句: Dickson你又一枝獨秀喎...)
Kneta(對住Dickson): 你做咩啊你?
Dickson(腼腆): 我用個心嚟諗緊。我未舉,舉得慢啲啫唔好意思... (眾人: 哦...)
///
旁白: 咁今日嘅事主呢,就係因為移民而引發出感情問題呀,就係佢嘅另一半,唔知要唔要跟埋佢移民一齊走呀?
(螢幕顯示: 今集主題: 我有BNO你竟然唔跟我走?)
東方昇: 因為近排都有好多人移民,就唔帶隻狗去呀。嘩! 而家連女朋友都唔帶呀?
Kneta(指正): 唔係唔帶,係個女朋友要諗一諗啫。
東方昇: 咁又係喎,啲狗都...
Dickson: 隻狗一定會跟你走架嘛。(眾人笑)
東方昇: 狗就一定跟你... 肯帶佢,佢一定跟你走,但女朋友呢,都真係會有呢個問題。好!
利君牙: 電話嚟啦。

下載檔案

下載檔案

1

1

營運經費相當貧乏,敬請體諒我們投放少量Google Ads!

1

---過場---
(螢幕: 圍爐buddy: Ronald(化名) (聲音經過特別處理)

東方昇: Ronald你好啊,你喺英國嗰邊而家係幾點啊?
Ronald: 而家...
東方昇(笑): 唔係,你喺香港嘅,我問吓你啫~ okay 好,你可以講你嘅故事出嚟喇。
Ronald: 係,咁就... 其實同女朋友拍拖大概兩年,呢兩年都好多事發生啦,跟住其實好早就已經想移民㗎喇,咁我2019年就已經續左個BNO (螢幕飄過: Ronald兩年前已經計劃移民),咁嗰時同佢傾,佢都係諗住會一齊走咁嘅。(眾人認真、專註地聽著) 咁因為我哋比較早續啦,大概今年年尾到啦,其實就已經預備可以走嘅。但係今年年頭嘅時候,我女朋友就同我講: Errr 如果你繼續plan移民嘅話,就唔好考慮埋佢喇。
眾人(張嘴、驚嘆、加上配樂): 哦!!!!!!
東方昇:即係你有多張船飛,佢都唔跟你走喇喎?
Ronald: 咁船飛大家自己拎返嚟嘅~ (眾人笑)
眾人(圍插東方昇): #%^*+=???? (翻譯不能)
利君牙: Ronald唔好理佢!

東方昇: 咁你晴天霹靂㗎啦下話? (激動) 預咗你㗎啦喎! 預咗你上車㗎喎! 預咗你個位㗎喎! (Kneta: 飛都買埋喎) 係囉!
Ronald: 究竟佢係咩原因會咁樣講呢? (螢幕:究竟係咩原因突然轉呔呢?) 你話有好多因素,想留低,我okay嘅;但如果係因為大家關係裏面覺得唔鍾意大家而咁樣講嘅話,咁我覺得個問題會大啲囉... Hurt啲囉...
利君牙: 咁佢最後係話咩原因啊?
Ronald: 佢畀我嘅答覆係話: 佢係擔心如果到時過咗去,諗返轉頭後悔嘅時候,你去到嗰邊都好難再返返轉頭。(螢幕: 唔跟你走原因 #1 驚自己未來會後悔)
Kneta: 即係驚,去到英國,大家得兩條友,即係相依為命啦,咁到時嘈交嘅時候—
啊你唔要我啦~ 要同我散喇~ 咁我自己一個留喺英國,我係絕對唔會想囉。
Dickson: 即係簡單啲嚟講,就係個恐懼大過嗰個愛。(Kneta大力點頭: 係啊!) 但移民咗之後,唔可以就咁買張機票就咁返嚟嘅咩?
東方昇: 咁咪會掉低阿Ronny一個啊嘛... (螢幕: 冇咁容易回頭㗎... 葉師傅...)
利君牙(大聲): Ronald啊! (眾人又圍插東方昇,東方昇頭頂出現caption: 又記錯人名)
Kneta: 邊個啊? 東方昇: Ronald一個呀嘛...

Ronald: 啫係你係放棄咗好多嘢,先至過咗去㗎嘛,咁你唔係話買張機票,跟住返嚟就可以拎得返香港嘅嘢...
東方昇(認真、慢慢梳理思緒): 因為有少少,其實Ronald我聽得出你已經認定佢係你嘅另一半㗎喇~ (Ronald: 係...) 反而覺得佢可能有啲猶豫...
Ronald: 其實佢應該係叫做,已經話咗個答案或者表咗態畀我聽(眾人苦笑),佢諗住留喺香港㗎喇。
阿tom(細細聲): 咁你走啦唔洗理佢。

1

1

利君牙(立刻): 咁但係,因為你話呀女仔呢,佢驚自己會後悔,但佢係冇講話驚後悔驚咩,驚冇得真係可以同你一世呀,定可能係其他原因啊? 即係可能做嘢嗰啲啊?
Ronald: 其實佢喺香港做嘢方面,佢有一個幾難得同埋幾好嘅機會(螢幕: 唔跟你走原因 #2 女方嘅事業有唔錯嘅發展機會),呢個係第二個原因,所以佢會想留喺香港。(東方昇沉思)
阿tom: 我諗你女朋友係事業型、事業心好重嗰啲。(Kneta: 我絕對明呀。)
Kneta: 我作為女仔,我等到呢個年紀,我先有一個自己覺得好好嘅事業機會喎 (阿tom大力點頭),咁我一定會去搏埋佢囉。
東方昇: 我覺得呢個就係每個人嘅取態唔同,(伸手指住利君牙)即係我問下利君牙喇~ (利君牙笑: 係~)
東方昇(大聲): 呢一刻! 你嘅另一半(腦細)話移民! 你會唔會放棄香港嘅事業啊? (眾人展示玩味的眼神)
利君牙: 我唔會。
(再指Kneta) Kneta: 我都唔會~ 我肯定唔會。
(再指阿tom) Tom: 我都唔會~
(最後指向dickson) Dickson無語: ……
利君牙大笑: 唔係,循例都問一問! (螢幕: 又玩歧視...)
東方昇(輕佻): 都問下Dickson先~
利君牙(拍Dickson膊頭): 你會唔會?
Dickson: 我.. (Kneta: 佢會) 我都唔識講英文...
利君牙(笑著、大動作攤開手): Okay 我哋返返嚟~~~

東方昇: 我喇,如果我諗呀... Errrrrrrr 我係會嘅! (表示驚訝的聲效) 所以其實要衡量嘅係,事業心和愛情啦,有啲人事業心大啲,咪選擇會重視事業,就留低囉;咁如果你愛情擺先嘅話,佢個事業有幾重都走啦~ (眾人: 嗯...) 啫係我覺得,如果阿Ronald另一半係事業型嘅呢,我覺得Ronald心入面都舒服啲,因為冇辦法啦~ 輸畀事業~ (Dickson(插嘴): 唔係因為自己呀嘛~) 我反而驚係,Ronald嘅另一半對你哋嘅愛都仲有啲質疑,如果你要挽救,我覺得你有冇得畀啲信心佢,(握拳)覺得你係會揀定佢...
利君牙(拍抬): 即刻結婚! (Kneta: 結婚囉。) (阿tom: 即刻結婚囉。)
Kneta: 如果你話結婚,咁我簽左紙先囉,都好過就咁樣兩手空空(螢幕: Kneta建議: 可以簽左紙先表明自己真係揀定佢),大家就: 哦、我男朋友、我女朋友咁樣樣囉。
東方昇: 你有冇提出過呢阿Ronny?
眾人(怒): Ronald啊!!!! (東方昇頭上寫上: 第二次記錯人名)
Ronald: 冇嘅,但係我而家問佢,佢一定會覺得,係因為移民所以先隱住結婚囉,咁反而可能會有個反效果...

1

1

東方昇: 喂咁反而我會問一個問題啦,咁你個女朋友係咪後生好多㗎? 廿𡃁歲?
Ronald: 24、5 (全場驚呼: 哦/嘩/Wow!!!!!) (螢幕大字 唔怪得唔講得結婚啦)
Kneta: 咁明啦! 咁明喇... 如果我... 即係想當年如果我24,唔係,如果我將來24歲(眾人笑)(螢幕: 想當年?)
Kneta(大聲): 將來 廿 四 歲! (Dickson: 阿姐~) 即係我未來24歲的話,如果有個男人突然叫我放棄所有喇,即係我有男朋友啦,叫我放棄晒所有嘢,無論係咪事業,我都覺得自己唔得。
東方昇: 唔好話移民定結婚口竹,齋結婚都大鑊呀 (Kneta: 我都未必呀。) 而家係移民加結婚兩樣嘢,捆綁埋一齊喎,仲要一齊面對陌生嘅環境,可能承受嘅挑戰係更加大。

Kneta: 咁我又想問喇Ronald,如果當係唔講結婚呢樣嘢啦,咁你...係會唔會堅持過去呀,定還是會等佢咁樣?
Ronald: 我諗... 我暫時... 繼續等嘅...
眾人: 哦... (螢幕: 癡情男兒呀)
阿tom: 即係唔會走住。
東方昇: 嗱,咁我覺得啦,你等都好,你都要set一個限期畀自己,就算你等佢啦,我驚到頭來佢會同你講,其實... 你唔洗等... (阿tom: 嘩...~~~)
Dickson: 即係就算你唔移民,我都唔跟你喇!
東方昇: 係呀~ 你唔想浪費大家嘅時間,就其實係要問清楚。因為你可能會由愛變成恨。(螢幕: 東方昇建議... 溝通清楚再決定等唔等)
Kneta(模擬情景): 唉! 嘥我時間!
東方昇: 唉,我等你,我都已經唔移民喇,初頭你由移民到唔移民,我再等你,最尾你又...
利君牙: 早講啦大佬!!!! (東方昇: 係啊,你會好...)
Ronald: 咁憎又唔會嘅應該。因為始終鍾意嘅就係鍾意,如果嗰時真係咁樣發生啦,好似你哋講咁樣,都... 冇辦法啦~

東方昇: 我覺得你要搵個答案,如果唔係你會晒你自己時間。(Ronald: 即係你哋覺得應該早啲大家...?) 要呀~~~
阿tom: 一定要攤出嚟講。
Dickson: 簡單啲講如果佢真係同你講,唔係啊我真係因為純粹唔想移民,咁你咪等囉~ 但如果唔係,佢就會再諗個方法,咿咿哦哦,或者咩—
東方昇: 你咪灑脫啲離開呢個傷心地,去英國食鬼妹啊嘛~ (眾人笑) 食鬼妹都唔錯架!
嗱我會再問喇,如果佢真係話,我哋都行唔到落去喇,咁你會唔會移民去英國呀?
Ronald: 我諗我都未必會即刻去,因為我會嘗試睇下挽唔挽救到。
東方昇: 佢真係好癡情呀我覺得。(Dickson: 因為佢嘅愛係大過移民呀嘛。) 其實我好欣賞阿Ronny。
Kneta: Ronald呀!!!!!! (螢幕: 第三次記錯人名) (笑)邊度嚟㗎呢個名?

Ronald: 唉...
Dickson: 佢可能知道其實可能... 唔係同移民有關囉。(東方昇: 佢嗰下歎氣...) 係呀... 所以你先唔敢攞出嚟傾...
東方昇: Ronald都有啲答案㗎喇... 冇呀,等Ronald自己決定啦,我覺得你係知道嘅,你好清楚嘅其實,好冇呀?
Ronald: 嗯,知道!
眾人: 加油啊/加油加油 !!!!!!
Ronald: 唔該晒你哋!
眾人+Ronald: 好啦,拜拜! (拜拜~)

1

1

---過場---
旁白: 大家有冇試過,為愛情而放棄一啲好緊要嘅事呀? (Dickson: 我就一定冇嘅。)
利君牙: 放棄同阿媽食飯囉。(Tom恥笑)(東方昇: 即係好細嘅事啦)
Dickson+ 利君牙: 好緊要架喇! X2
Dickson: 好有家庭觀念。

Kneta: 為咗愛情放棄返屋企囉~ (Tom: 嘩喺。 利君牙: 吓!?) 好小事咋喎~
東方昇: 我就緊要啲! 嗱,我好偉大嘅我覺得。我為咗愛情而放棄... 我媾其他女囉! (攤開手)
(眾人一臉鄙視)(Kneta扶額) (螢幕: 咁你都講得出口...?)
東方昇: 嘩! 對我嚟講好大捨棄㗎喇! (Tom: 收皮!!! 收皮!!!) 真係啊,我要做一個專一嘅動物呀。我咁嘅樣喎大佬~
(眾人沉默、不想給反應)
利君牙: 咁嘅樣你都講得出? (拍肩) 辛苦你喇。

---過場---
阿tom: 咁我就相反嘅,因為我上年啦,同個KL人分咗手? (眾人: KL?) KL人,即馬來西亞人,即係佢哋馬來西亞嗰邊拆得好細㗎,總之就KL人啦。之前每一個月我飛過去佢又飛過嚟,咁然後就比人叫飛雞啦,即係人哋就千里送鵝毛,我就千里送菊咁樣啦。(螢幕: 千里送菊)
東方昇(插嘴): 飛鴨下話? (Kneta、利君牙笑著拍打東方昇)
---爆炸畫面過場---
阿tom(無奈): 我唔係鴨囉X! 我係雞! 我係雞!!! Okay?
---過場---
阿tom: 佢有曾經同我講,佢話叫我搬去KL同佢住啦,咁佢就養我咁,但我嗰時concern嘅一樣嘢係: 啊,咁我有屋企人㗎嘛,有我家姐、有我阿媽啦,咁同埋我事業就啱啱開始起步緊,at last 我就真係同佢講,進入一個冷靜期啦,我哋慢慢去丟淡成件事咁樣囉。
東方昇: 所以我覺得某程度上,你又後生啦,你有選擇,其實為著愛情你會唔會為對方捨棄一樣嘢,其實好自私地睇,係睇自己有幾多資本。同頭先個情況一樣,其實同年齡真係有關(眾人點頭),多選擇你就會覺得,唔揀你咪揀第二個囉,我仲有無限可能性。其實你唔同年齡都有唔同心態,所以有啲人話,愛情係睇timing㗎嘛。
(螢幕: Timing未必係「相遇嘅時間」,亦可以係相遇嘅年紀)
東方昇: 呢個就係個timing,timing影響你諗嗰時你重視乜嘢。我好欣賞啲人話私奔,私奔係最浪漫、最偉大,你真係扔走哂所有嘢,就愛情行先。(Dickson: 來讓我跟你走~) 係呀~ 跟另一個去喎。你諗下,私奔個字點嚟啊——

(配樂突變+加上奇怪聲效)
撕 賓 周呀! (kneta 異口同聲一同說了周字) (眾人無奈苦笑,利君牙大笑)
東方昇: 可以撕賓周咁X決絕呀! 你就知道幾偉大啊! (利君牙: 咁痛都撕落去呀!) 係呀!
東方昇: 好啦,咁我哋今日都差唔多啦~ (Dickson: 好啦) (利君牙: 呀~ 今日好heavy呀~)
眾人: 拜拜~~~

1

IMG_1410.PNG

在囚手足能夠接觸外間資訊的渠道寥寥可數,Youtube 機頂盒為每星期從 Youtube 上挑選不同種類的專題影片並製作成謄本、印刷成信件並寄到在囚手足手上的長期計劃。

你唔需要使用真實身份同披露自己地址就可以同手足做筆友喇!

立即登記成為筆友啦!話俾在囚手足知我哋無忘記佢!

其他最新謄本

https-::www.youtube.com:watch?v=TSJwMZvw

臉書、谷歌數位監控的未來...中國社會信用體系? 如何終結監控?書來面對 EP18《監控資本主義時代》下集 Shoshana Zuboff / 說書【資訊/社會科學】

超級歪 SuperY | 時政類

https-::www.youtube.com:watch?v=TSJwMZvw

晚吹:又要威又要戴頭盔—驅魔人II

ViuTV | 娛樂類

https-::www.youtube.com:watch?v=TSJwMZvw

「米膠波台」【歐國盃】各小組分析+出線球隊預測(下)

米膠波台 | 娛樂類

https-::www.youtube.com:watch?v=TSJwMZvw

「米膠波台」【歐國盃】各小組分析+出線球隊預測(上)

米膠波台 | 娛樂類

https-::www.youtube.com:watch?v=TSJwMZvw

【驚爆結局】2021最瘋狂比賽?F1阿塞拜疆站賽後回顧| 阿非講賽車 EP 74

FAYE TV | 娛樂類

0