1

13/4《圍爐取戀》- 有個變態佬跟蹤我

毛記電視 | 娛樂類 | May 2, 2021

此影片謄本由Damn製作

非作商業用途,本檔案版權歸版權持有人獨有

<序幕>

聽眾:佢係咁留言話「我喺你屋企樓下等你呀」、「你見下我啦。」跟住後尾,到後面就開始嬲喇

龍志權:「你好落嚟喇喎!」

聽眾:類似,類似

幕後:其實我哋收到嘅投稿裡面,都有幾個男仔畀男仔跟蹤㗎喎

--------小劇場 (車廂) --------
專家Dickson:喂你睇住唔好亂嚟呀大佬…

利君牙:插褲袋…插褲袋……插人哋嗰個呀!

專家Dickson:喂!唔係!唔係! 冇跟住啦嘛?




<正題>

眾:Hello大家好


利君牙:我有個好消息想同大家宣布呀,今日東方昇唔喺度呀!

利君牙&Kneta:Wuhooooo~~~

利君牙:慶祝活動!Yeah!!!! (High five) …………你哋做乜扮哂唔開心咁樣呀?

龍志權:唔係,即係我哋勢力弱咗呀而家

Kneta:啱囉!我哋就一路畀你哋壓住

專家Dickson:我哋邊有壓住你…

Kneta:嗱!你聽我講一次,而家我掘起喇!我哋就浮起喇!

龍志權:我哋做過啲咩啫…

利君牙:好!我哋嚟喇!導演我哋今日講咩呀?

幕後:首先呢,就係update返圍爐dating嘅最新情況呀

利君牙:哦~ Alison呀,點呀?

幕後:咁根據Alison今日最新嘅message呢,其實佢哋兩個呢,依家傾得幾好嘅。不過大家畀啲空間,等佢哋慢慢發展下先

眾:好!

利君牙:咁導演我哋今集講咩呀?

幕後:咁今日嘅case呢,係「畀求愛不遂嘅變態跟蹤」呀

下載檔案

下載檔案

1

1

營運經費相當貧乏,敬請體諒我們投放少量Google Ads!

1

眾:哦~

Kneta:係咪你平時做開嗰啲呀?

龍志權:我好少呀…

利君牙:咁我知點解東方昇今日唔嚟喇…

Kneta:因為佢去跟緊人

龍志權:跟緊呀跟緊呀!

專家Dickson:平時着住嗰啲風褸呀,戴住個cap帽呀…

利君牙:似呀似呀

Kneta:即係入面唔着衫嗰啲呀嘛

利君牙:好喇!打電話!

Kneta:聽下今集嘅受訪者講啲咩先!



利君牙:喂?Kristie,咁你可以開始你嘅故事喇

Kristie(化名):咁我今日呢就係想分享一段我曾經畀一個變態嘅人求愛不遂,跟住日日跟蹤我嘅故事

眾:嗯~

Kristie(化名):咁呢個男仔呢,就喺嗰啲打機group度識嘅,咁一齊打機啦,都幾啱傾。咁過咗一排就好自然哋約出嚟食個飯,咁佢外表都ok嘅

利君牙:外表有幾ok呀?

Kristie(化名):Errr…都高大嘅。即係係我喜歡嗰type嚟嘅

利君牙:好似幾正喎聽落

Kristie(化名):總之就好似正正常常啦,都冇乜特別嘅。跟住慢慢呢,佢啲痴線嘢呢就出哂嚟,我就好驚喇

利君牙:例如呢?

Kristie(化名):有一日我放工嘅時候呢,我途中見到佢喎,咁撞到都唔出奇嘅,加上佢又冇叫我啦,當時我就冇諗咁多。咁之後呢,每一日收工呢,我都會喺同一條路度撞到佢

[毛管戙行徑#1:每日收工路上嘅"偶遇"]

龍志權:佢企喺度呀直程?

Kristie(化名):迎面,迎面

Kneta:即係扮不經意嗰啲

專家Dickson:唔係,扮嗰啲檸檬茶廣告,「Hello~咁啱嘅」

利君牙:喂,咁我想問下,呢個係食完飯之後幾耐發生㗎?

Kristie(化名):大約半個月左右。因為接近我生日。之後呢,每一日收工我都會迎面撞到佢啦,咁就開始覺得有啲怪怪哋。跟住突然間有一日呢,我就唔再喺嗰條路見到佢啦,就突然間喺公司樓下囉

1

1

[毛管戙行徑#2:每日喺公司樓下強制性接收工]

利君牙:行近咗

Kristie(化名):公司係啲office嗰啲嚟嘅,咁一出去一落lift呢,就得一條路走㗎啫,咁佢就企喺嗰個位囉

龍志權:嘩…真係死路一條喎咁樣…

Kristie(化名):咁我梗係走啦係咪先,跟住我電話就響喇喎,佢問我點解唔理佢,我就話「咁你搵我做乜嘢?」佢就話「知你就嚟生日,所以想送份禮物畀你」

專家Dickson:唔係,因為佢覺得呢個係浪漫嘅一種。譬如我畀個surprise你,然後棟喺你樓下,跟住之後就畀份禮物你

利君牙:真係你先明嗰個諗法…

龍志權:你唔好咁樣啦好嘛?

專家Dickson:你又唔好咁講…即係我嘗試同情理解嗰個人做緊咩啫

龍志權:人哋會打招呼㗎

Kneta:不過我有另外一樣嘢好奇,係佢點樣知道你喺邊度返工呢?

Kristie(化名):Errr…我之前同佢食飯呢,一兩次都係固定某個地點、某個鐘數,我會喺嗰度出現㗎嘛,咁你咪知道我大約幾點幾時會喺邊個地方出現囉

[言下之意…個男仔其實埋伏咗Kristie一段時間]

Kneta:嘩…好痂線喎我覺得。即係之前睇新聞呢,有一個係睇嗰個女仔隻眼嘅倒影呀,之後搵到佢屋企喺邊囉,之後喺佢樓下等佢嗰啲囉。即係呢啲都好變態

龍志權:佢梗係知啦,佢依家身處其境㗎嘛

利君牙:係喎(笑)…繼續呀,送禮物,然後呢?

Kristie(化名):跟住我就話「我唔要喇」,因為我嗰時已經有啲驚,因為日日都咁見到佢,仲要喺公司樓下見到佢,咁我就叫佢唔好再跟住我啦。但係第二日收工呢,我又見到佢喺公司樓下,咁有個男同事就同我同一條路返去嘅,咁我就話「你可唔可以陪我返去,因為真係有啲驚」。可能佢見到咁樣呢,佢就即刻發哂矛,佢就打畀我啦,佢就話「嗰個男人邊個嚟㗎!」咁樣。佢完全個語氣係質問我,好惡。

[毛管戙行徑#3:開始以"男朋友"身份自居]

龍志權:佢當正自己係你男朋友嗰隻

利君牙:佢喺自己幻想嗰度呀…幻愛喇佢開始

Kristie(化名):係呀,跟住佢都冇死心啦,我份禮物就冇要到啦,佢就上網search我公司嘅地址,跟住順豐寄咗畀我囉

[毛管戙行徑#4:強制性逼人收禮物]

Kristie(化名):Reception見到名又啱電話又啱,就簽收咗喇

利君牙:喂,咁所以喺佢嘅認知入面,佢嘅幻愛成立咗喎,即係你接受咗佢愛意喎

龍志權:女朋友喇已經

Kristie(化名):係呀,所以佢嗰日收工就不斷打畀我騷擾我,跟住我留言信箱全部都畀佢留爆哂啦,咁我delete咗佢又即刻打爆囉

[毛管戙行徑#5:電話騷擾]

利君牙:內容係咩呀?

Kristie(化名):係咁留言話「我喺你屋企樓下等你呀」、「你落嚟啦」、「你見下我啦」,跟住後尾,到後面就開始嬲喇,即係講哂粗口…

龍志權:「你好落嚟喇喎!」

Kristie(化名):類似,類似。咁我住比較低層嘅,即係我喺個窗口度會見到樓下嘅,見到佢喺屋企樓下就企咗好耐,企到11點幾,12點咁樣囉

1

1

[毛管戙行徑#6:喺屋企樓下埋伏]

Kneta:嘩…好X痴線喎呢啲

利君牙:其實我同你呢有個好類似嘅經歷,而我呢件事係持續咗五六年囉

龍志權:完咗未㗎

利君牙:……上年到完咗。我唔可以話畀你知解決到嘅辦法,但係我可以話畀你知乜嘢唔好做囉。即係我嗰陣呢就係暑期工,咁我就識咗一個同事啦。因為我個facebook呢以前又係咩都post哂上去嘅,咁佢就知我住邊個屋苑,咁佢就開始會嚟我屋企樓下喇…

[千祈唔好做#1:咩都post上網]

利君牙:…嗱,我做過啲咩呢,因為佢成日呢…嗱,好…好嘔心呀呢件事,但係我都想同大家講,佢就會覺得我係天使嚟㗎嘛。即係成日喺啲voicemail度讚我囉,「你真係好似天使咁純潔」定唔知乜乜乜乜。咁我就聽到,天使呀?咁我就做啲唔天使嘅嘢出嚟先。我就試過佢打電話畀我我一嚟就係咁講粗口囉,講啲唔合理嘅粗口囉

龍志權:跟住佢就話「你啲粗口真係好似天使啲歌聲一樣」

利君牙:咁樣咁邪惡之後呢,佢都係咁鐘意我喎,所以我就覺得,啊原來呢啲係唔work嘅,即係唔可以鬧佢,唔可以刺激佢。跟住就純粹唔理佢,唔理佢好耐囉,報警呢件事呢係冇用嘅

[千祈唔好做#2:鬧佢 / 刺激佢]

Kneta:咁起碼可以有個阻嚇性呀

利君牙:因為我嗰陣呢係好耐之前就報警㗎喇,即係坐喺度同你傾一拃嘢,之後就同你講話「其實冇用㗎喇,如果佢唔行到同你距離300米呢,你都告唔到佢㗎」 你可以兇佢話報咗警囉,但係報警呢件事係冇用嘅…… 咁你最後點解決呀?

Kristie(化名):突然間有一晚佢就同我講「唉,算啦都係,我唔會再搵你㗎喇」,但係其實第二日又繼續過囉

利君牙:哦,即係佢清醒過,然後再…

專家Dickson:然後發覺佢都係唔得,佢真係太愛你喇,所以佢繼續痴線呀

Kneta:可唔可以對住呢啲變態佬呢,反變態佢呀?即係再痴線過佢,跟住佢跟住我

專家Dickson:你咁做,佢可能好開心㗎喎

龍志權:我驚,即係有咩差池啫

專家Dickson:我個人認為,練武強身係非常之重要嘅

龍志權:哎,呢個係其一啦,即係嗰啲防身術呀嗰啲呀嘛

專家Dickson:因為如果佢痴情到痴線嘅話,咁就算你做一啲好微細嘅嘢,佢都會放到好大嘅。某程度上你要避呢一種人呢,其實係冇得避嘅,只能夠集中事後應付佢哋,而事前就係好難防避㗎

[Dickson認為...其實冇得避,只能學識保護自己]

利君牙:我就實際啲呀,因為你想解決個麻煩咋嘛,除咗兇佢話備咗案之外呢,我覺得可以轉電話號碼嘅

[利君牙認為...一了百了轉電話號碼!]

龍志權:呢個呢,即係以前就易啲。即係轉電話,搬埋,人哋就一世都搵唔到你。但係而家呢,就算你搬到去邊,佢都真係有辦法可以搵到你呀

Kneta:嗱,我嘅做法就應該唔啱嘅!但我自己會咁做就係直程搵一個人陪我,就直接落去X柒佢囉。因為我覺得好困擾呀

[Kneta認為...要搵人幫拖正面還擊!]

利君牙:咁樣唔work㗎,佢會覺得佢有個機會可以同你近距離接觸呀。咁佢就會覺得,哦原來咁樣就可以令到你過嚟搵我嘅。因為鬧我都係接觸我嘅一種

專家Dickson:打者愛也呀

龍志權:喂!咁抬住罐石油氣落去得唔得呀

Kneta:係囉!就攞住把菜刀,「你再嚟吖!」

眾:哈哈哈哈

利君牙:可能好啲

專家Dickson:希望我哋嘅所謂建議可以幫到你啦

利君牙:好啦,咁唔該哂Kristie~

Kristie(化名):唔好客氣,唔好客氣

專家Dickson:多謝你分享

眾:拜拜~

Kristie(化名):好,拜拜~

1

1

幕後:好,咁啱啱嘅case呢,就係女仔畀男仔跟蹤呀嘛,但其實我哋收到嘅投稿入面呢,都有幾個男仔畀男仔跟蹤㗎喎。

龍志權:有~

幕後:係喇,咁其中一個頗為有趣嘅呢,就想在場兩位男士演示一下喎。咁你哋揀一個人做變態先啦

專家Dickson:唔係!

利君牙:你可唔可以做變態嗰個

專家Dickson:嗰個case…嗰個case唔使「拮」㗎嘛?

幕後:唔需要「拮」嘅,唔需要「拮」嘅

龍志權:我畀你跟呀

專家Dickson:你畀我跟呀?

龍志權:好冇呀?

專家Dickson:即係我變態? 因為我個樣似變態呀?

龍志權:Sorry我跟你,我跟你,我跟你

專家Dickson:好好好好好

龍志權:我哋係聽指示呀嘛?

幕後:係,你哋聽指示。首先呢,「今日我喺地鐵入面玩住部手機,突然間上嚟咗一個男人,同我距離係有啲遠嘅。佢望一望我,之後慢慢向我靠近,靠近我嘅背後...」

專家Dickson:嘩!你又話唔「拮」嘅!

幕後:「跟住佢開始聞我嘅後背,將下巴擺喺我嘅左肩上,跟住...」

專家Dickson:喂!你仲有幾多「跟住」呀大佬!

幕後:「跟住同我一齊睇我部手機,跟住佢就準備開始聞我個鼻...」

專家Dickson:喂!你睇住,唔好咀落嚟呀大佬

利君牙:插唔插褲袋呀?

(龍志權插自己褲袋)

利君牙&Kneta:插人哋嗰個呀!!

專家Dickson:唔係!唔係! 冇跟住㗎嘛?冇跟住就可以坐返低先

利君牙:完咗未呀個故事?

幕後:完咗喇,完咗喇

利君牙:呀!好喇好喇,唔好笑喇。其實我覺得無論男女呢,都有機會遇到呢一啲...

Kneta:變態事件嘅

專家Dickson:其實你唔好話,就算佢(龍志權)識我都好驚呀大佬

Kneta:咁近

專家Dickson:所以,所以我哋其實係要嚴正地...

Kneta:正視呢個問題

專家Dickson:希望大家能夠避免到呢樣嘢嘅

利君牙:如果避免唔到都要識得保護自己

龍志權:我覺得有時即係唔係同佢嚟硬嘅添呀。喂,唔夠抽,唔夠盛,走呀直程!跑走呀

專家Dickson:三十六計,走為上著

利君牙:係~

專家Dickson:好啦,希望大家唔好遇到呢啲咁嘅變態啦

利君牙:好喇好喇

眾:拜拜~

1

IMG_1410.PNG

在囚手足能夠接觸外間資訊的渠道寥寥可數,Youtube 機頂盒為每星期從 Youtube 上挑選不同種類的專題影片並製作成謄本、印刷成信件並寄到在囚手足手上的長期計劃。

你唔需要使用真實身份同披露自己地址就可以同手足做筆友喇!

立即登記成為筆友啦!話俾在囚手足知我哋無忘記佢!

其他最新謄本

https-::www.youtube.com:watch?v=TSJwMZvw

周冠威(3):(中英) 若恐懼可傳染,希望勇氣也可以傳染開去;秘拍《時代革命》於康城首映,紀錄反送中憂歷史被扭曲;恐懼未到不自我審查 ;信念是冒險、毋懼、自由|2021年7月16日 | 珍言真語 梁珍

珍言真語 | 時政類

https-::www.youtube.com:watch?v=TSJwMZvw

立場調查報道長片|7.21 尋源

Stand News 立場新聞 | 時政類

https-::www.youtube.com:watch?v=TSJwMZvw

邊一個發明了返工?邊一份工最陰公?(同場加映:老闆語錄應對心得)|格物冷知識|格物致知

格物 Blank in Blank | 歷史類

https-::www.youtube.com:watch?v=TSJwMZvw

伊朗政府推婚友app救生育!年輕人為何不婚、不生 還得靠「臨時婚姻」解套?【TODAY 看世界】

TODAY 看世界 | 時政類

https-::www.youtube.com:watch?v=TSJwMZvw

奔走24年踏遍40萬公里 找回親生兒子 感人的背後 中國拐賣兒童到底多嚴重?【TODAY 看世界】

TODAY 看世界 | 時政類

0