1

鏗鏘集:天眼

RTHK 香港電台 | 時政類 | Mar 13, 2021

此影片謄本由燕子生命製作

(旁白)旺角鬧市之中,周圍都係閉路電視,你有冇試過抬頭一望,發現有大廈頂樓或者外牆鏡頭影住你,依啲鏡頭係邊個設置嘅呢?
(權哥)咁樣好似隱藏鏡頭,身為旺角嘅居民,就係覺得依啲嘢好唔妥當嘅做法。
(旁白)近年唔同嘅政府部門喺各區都有設置閉路電視,協助監察同執法。
(邵)嗰個閉路電視唔係俾你,個閉路電視係俾佢㗎,所以嗰個係 big brother is watching you.
(旁白)依啲閉路電視規格有幾高清?收集咗嘅片段有冇受到監管?市民想查閱,又得唔得呢?

今年60歲嘅權哥,張志權,大約5年前搬入旺角依個近400呎嘅唐樓單位。

(權哥)初時嚟依度呢,依間房都諗過做睡房嘅。但係呢就發覺原來個鏡頭對得仲更加正,所以放棄左唔用依間房,做咗雜物房啊。

(旁白)當時發現窗出面有部閉路電視,佢一直不以為意,到年幾前多咗人討論超高清閉路電視系統引申嘅私隱問題,佢先擔心自己間屋會被攝入鏡頭。

(權哥)個鏡頭就向右邊嗰度, 我睇到佢,咁個鏡頭應該都睇到我,係咪先?咁樣影發,我哋依間係睡房嚟嘅,好似俾人監視咁,好唔自在啲生活。即係商業大廈咁高層,喺牆出邊嗰度整個閉路電視喺度,係有咩作用呢?依個係疑問嚟㗎囉?
係咪商業大廈自己本身裝抑或係政府裝?即係街坊、依度居民係完全唔知。

(旁白)權哥話住喺旺角,對閉路電視鏡頭早以見怪不怪,佢話單係佢住緊嘅大廈入面就至少有六支閉路電視,究竟係邊個安裝佢都唔係好肯定。

(權哥)依度一落樓梯就有一個cam,依度上面又一個啦,再落嚟依度上面有一個,左邊又有一個,再落又有一個,都唔知有咩作用。依度又有一個cam。(出到街)依個位置望上去,上面一個cam,差唔多喺9樓,即係同我屋企差唔多高。依個cam應該就係有個位影到我哋個睡房,所以依個cam 係有壓迫感喺度。

(旁白)落到街又係見到一堆閉路電視,權哥話理解商店為咗保安防盜需要敢做。

(權哥)銀行中心大廈嘅左右都有一個cam喺度,你喺依個位置總共有五個cam ,咁銀行中心喺門口依度 佢係照住門口出入 d cam就比較正常。

(旁白)天眼處處,佢話去街市買餸嘅一段路都唔難發現依類裝喺大廈外墻高處,有冇警告標示嘅天眼。

(權哥)依度係雅蘭中心,依度都有個cam喺度,再上邊仲有兩個喺度,沿途有14個閉路電視,全程係俾人監視咁樣,好有壓迫感。

下載檔案

下載檔案

1

1

營運經費相當貧乏,敬請體諒我們投放少量Google Ads!

1

(旁白)我哋係旺角西洋菜南街附近嘅山東街同彌敦道,就咁睇都見到超過20枝,依一類裝喺大廈外牆高處或者天台嘅鏡頭,依啲鏡頭究竟係邊個設置嘅呢?根據,油尖旺區議會嘅記錄,其中8支係2009年由區議會動議安裝嘅天眼系統,用嚟防止高空擲物。

「許德亮 油尖旺區議員(旺角西)」:09年大概6月到,曾經依度突然間「嘩」一聲,跟住有啲人話喺樓上有人掟鏹水彈落嚟。

(旁白)許德亮係旺角嘅區議員,見證住當年鏹水蛋案嘅事發經過,當年有份支持安裝閉路電視。

(許)啲人坐咗喺度、有啲人掩住面、有啲人攞住啲水喺度淋
,咁先至知道原來有人喺上邊揼咗鏹水彈。

(旁白)2008年至09年旺角西洋菜南街,當時嘅行人專用區,發生高空投擲腐蝕性液體案,近100人受傷。

(許)人就坐晒喺度,就應該係依個位,我推算就係依個位,可能係是但一座。

(旁白)許德亮話當時區議會建議設立天眼,事前做過咨詢,亦有顧及居民私隱。

(許)其實最重要,就係當初安裝天眼嗰陣時好困難,因為個天眼令好多大廈業主立案法團擔心,會唔會安咗天眼之後跌落嚟,大廈法團要負責任。其實當年喺家樂坊樓上嗰兩支呢,我哋係上過去睇過嘅,咁其實佢嗰個角度係全部照曬條街。根據政府官方嘅回應,佢係照唔到人哋間屋裏面嘅。

(旁白)至於依枝對住權哥屋企,位於銀行中心廣場外墻嘅鏡頭,唔係當年設立天眼,許德亮都唔知係邊個安裝。
(許)我冇發現依度有支鏡頭。
(旁白)有冇可能係銀行中心自己私人安裝?
(許)我真係唔知,我哋要查證返佢嘅角度照緊邊度。

(朱)對住個鏡頭,係對住個中間定係對住佢上面呢?

(旁白)權哥喺新任區議員朱江瑋度做兼職助理,朱江瑋舊年當選,選區範圍包括西洋菜南街。朱江瑋曾經向銀行中心廣場嘅管理處查詢。

(電話訪問錄音)嗰枝機係警方裝嘅,印象係14年咁上下,佢嗰陣時講,因為佢嗰陣時申請借我哋大廈裝閉路電視用嚟睇西洋菜街做監察。射喺邊個位呢?畫面我哋冇辦法睇到,淨係佢哋警方先睇到。

(朱)你都聽到啦,基本上就係,第一就係裝嘅商戶都唔知道究竟個影像保留幾耐?可能保留一世。第二個就係解像度都唔清楚,貫徹警方做法就係封閉,而且係隱密同埋唔公開,咁究竟發生乜事,對市民有咩影響,市民一概都冇辦法知道。

(旁白)我哋係西洋菜南街同附近兩條街度,見到十幾部閉路電視,佢哋裝置嘅地點非常接近,幾乎相隔一兩座大廈就有依啲天眼。我哋向部份相關嘅大廈查詢,其中兆萬中心管理處覆過我哋。(訪問錄音)「其實係警方要求裝置,咁我哋知道已經裝置咗相當長嘅一段時間,大概幾時同埋點解要裝依個嘅閉路電視?呢個我哋都唔係太清楚去答得到你,以我所知都裝咗好耐起碼超過五年以上。」

1

1

(旁白)我哋再向警方查詢,確認相關地點嘅天眼係佢哋裝嘅,
其中兩個地點嘅天眼已被拆除,警方強調鏡頭無錄影功能,用作協助維持公共安全設置,其設置亦已得到相關大廈組織嘅同意。至於警方喺旺角一共安裝左幾多支鏡頭、鏡頭係幾時安裝、乜嘢規格同像素等問題?警方就冇回應。
朱江瑋話以前區議會安裝天眼嗰陣,會根據私隱專員公署制定嘅閉路電視監察措施指引,喺當眼處標示警告字句提醒市民正被監察。

(朱)你會見到呢,喺西洋菜南街下面嗰塊牌,就係好早08年開始就有,因為喺政府角度就係我做過嘢,但其實老實講啊,如果俾個阿婆阿公睇,佢哋根本睇唔到,咁所以先至會有依條banner ,咁你可以睇到,呢度有,嗰邊都有。

(旁白)不過相關嘅指引並無約束力,而家亦唔係部部閉路電視都有加設標示提醒,加上執法部門設置鏡頭用作,防止罪行受私隱條例豁免。朱江瑋覺得而家天眼無處不在,個人私隱幾乎蕩然無存。

(朱)應該話係私隱專員公署本來就係,確保市民係有法可依,去保障自己私穩,但而家調返轉,政府只要冇條文禁止佢哋,佢哋就好似做乜都做得。事實上,佢係可以喺你完全唔知情嘅時候,裝咗好多監視系統。

何啟明 深水埗區議員(南昌東)
(何)上次嘅情況好恐怖,好多水喉堆晒喺度,你睇,成對門揼喺依度都得。依個位基本上係個黑點嚟嘅,成日都有泥頭、廁所、凳、咁樣。

(旁白)深水埗區議員何啟明,話區內胡亂棄置建築物廢料情況嚴峻,多年嚟解決唔到。四年前,環保處陸續喺全港黑點,設立百幾個攝錄鏡頭,監察棄置情況,深水埗區就有19支。

(何)咁依個就係環保處嗰個閉路電視,寫住EPD,以前依個位其實都係一個建築廢料黑點,成個轉角都堆滿曬嘅,有閉路電視都仍然有依啲廢物喺度。另一部機喺依度,影住好明顯就係向嗰邊,但係都照樣有垃圾、有建築廢料。

(旁白)何啟明話,當局要成功檢控,要透過執法人員在場突擊巡查,質疑單靠鏡頭影到都冇用。

(何)我假設,你真係影到嗰個人好清楚,佢走咗去,咁你又點捉佢?你唔會全城緝兇咁樣㗎嘛,嗰個荒謬位就喺依度,你影到都冇用。咁所以嗰個攝錄機嘅功用,一定要配合個執法人員企喺度,咁先得嘅。

(旁白)環保署喺安裝鏡頭嘅附近,設有大型橫額提醒市民正被監察。署方話全港今年截至9月,借助系統檢控嘅個案,占總數6成5,有221宗。認為系統發揮功能。不過深水埗有5枝依類鏡頭,由16年至今年9月成功檢控嘅數字係零。

(何)喺啱啱九月,清理嘅建築廢料數字,講緊係74公噸,成個深水埗區,74公噸講緊係7萬4000公斤,如果一包米八公斤,咁嗰度係講緊係接近係一萬包白米嘅規模嘅建築廢料棄置喺深水埗區。但係睇返環保署檢控數字,過去嗰個月檢控數字係零,即係捉一個人都捉唔到。

(旁白)好似依條後巷就有三部攝錄機,除咗環保處設置嘅鏡頭,亦可以見到食環署嘅監察系統,何啟明批評部門之間設置攝錄機嗰陣冇經過協調。

1

1

(何)依個後巷都係黑點嚟,環保處嗰個影住依邊,食環嗰個就影依邊加依邊,但係就冇影依邊,結果個個都揼哂嚟依度。

(旁白)我哋去唔同嘅政府部門查詢佢哋有冇安裝閉路電視,
環保署有143支,食環署有215支,康文署轄下場地有近9500支,房屋署話裝咗約有1900套,運輸署有1571支,不過海關同警方就冇提供相關數字。

(何)依啲嘅閉路電視,其實除咗影住去監察「垃圾蟲」、建築廢料之外,仲影到好多佢哋功能以外嘅事,咁而家我哋就係問問題啦,影到依啲片段你會點處理?由得佢、交畀其他部門,公開依啲片段。咁其實佢有好多個選擇同做法,咁我哋就會問,你有冇一個準則?有冇一個個指引?去限制自己。

(旁白)根據個人資料私隱條例當中第58條豁免條文,閉路電視片段可以用作防止罪案及偵測等用途。食環署同環保署過去四年曾經97次將片段交比其他部門。而海關同警務處就話無備存紀錄,市民亦可以透過私隱條例同公開資料守則,提出查閱依啲片段。運輸處話過去五年,有市民委託律師成功申請嘅個案,至於房屋署、康文署等部門,佢哋只係話無備存相關紀錄。


(邵家臻)鎖定咗兩部機體。第一部機,第二部機。

(旁白)立法會議員邵家臻,喺今年3月為三名露宿者爭取查閱康文署閉路電視資料。

(邵)其中一個案發現場就係依度,阿十就瞓依度,喺張凳依個位,咁阿春、阿山就係瞓依度,佢哋三個就瞓喺度。咁所以
嗰啲警察嚟到依度,點樣踢竇、點樣破壞佢哋嘅家當,依個鏡頭一定影得好清楚。多謝大家嚟到阿十嘅身後事記者招待會。依個記者會開始前,我哋先做一個默哀,為阿十嘅離世。

(旁白)今年2月有露宿者喺深水埗通州街被警方截查,三名露宿者投訴警員涉嫌破壞佢哋嘅個人物品同襲擊其中一名露宿者,警方先後拘捕九名警員。

(邵)第一封信就比康文署,第二封信呢就係授權書,老實講啦街友都唔係好習慣捍衛自己嘅權益,所以我哋攞到個授權書喺嗰個moment 對我嚟講係好重要,即係我覺得連街友都有一個爭取自己權益嘅意志。

(旁白)邵家臻協助街友,要求查閱當日有機會拍到肇事過程嘅片段,同康文處書信來往廿七次,歷時八個月都唔成功,佢話申請嘅程序雖然繁複,但一直都順利,只係去到睇片當日先收到康民處消息,話處方咨詢完警方後暫停睇片安排。

(邵)嗰種感覺就係又越過高山又越過谷,即係你聽到有警暴發生,你覺得好憤怒、好難過,跟住你追究,佢又話要等好耐先可以睇,跟住話又話唔可以睇,跟住話你交錢就可以睇,跟住就話寧願退返錢畀你,都唔可以睇。跟住人死咗,喺10月8號,即係三個當事人,一個喺監倉、一個喺天堂、一個仲喺公園,件事就係咁樣完。

(旁白)事後邵家臻向私隱專員公署投訴,先知道私隱條例有豁免條文,喺防止罪行、犯罪拘捕等情況下,可以拒絕查閱要求,警方回覆我哋查詢時話,暫停發放片段係因為相當可能會損害案件嘅刑事調查,及將來可能進行嘅審訊程序。

1

1

(邵)其實佢咪話俾你知啲閉路電視,係誰的閉路電視囉,閉路電視為誰而設囉,閉路電視係好多啊而家,成個社會都話要多啲添,咁樣我嚟拉你嘅時候就有閉路電視,你嚟保障自己嘅時候,就冇閉路電視。我要告你嘅時候,我就有好多閉路電視片段,但你要去捍衛自己嘅時候,你就攞唔到依啲片段,嗰個閉路電視唔係俾你㗎,個閉路電視係俾佢㗎!
所以嗰個係big brother is watching you,係佢望住你呀!唔係你攞嚟望住佢!

(權哥)個窗簾係長期噉樣㗎喇,咁樣係好少會開,除非係去街嗰時,就會打開少少囉,去到依個位,都唔開㗎啦,因為個cam就向依度。

(旁白)住喺旺角的居民權哥曾志權,上個月底經過查詢後,知道屋企窗戶對住個閉路電視,原來係警方設置。

(權哥)梗係好詫異,係咪先?如果係警方裝依啲cam喺度,裝到咁高係對住民居嘅係有乜作用呢?

(旁白)雖然警方解釋鏡頭無錄影功能,但係權哥話坊間嘅鏡頭規格越嚟越高清,擔心鏡頭影到屋內情況,希望警方可以向街坊公佈詳情,釋除佢嘅疑慮。

(權哥)都幾樣嘢想了解嘅,啲cam係有乜作用,會唔會影到我屋裏面嘅環境,即係啊而家喺內地都係好流行依啲鏡頭嘅出現嘅,周圍都係好多依啲鏡頭,啲人話依啲係監控。但係會用依個情況去監控啲市民嘅生活,你要早啲通知話畀我哋知嘛,就唔好話偷偷摸摸去裝咗又有冇人知,令到我哋喺度擔心呀,憂慮啦。

***謄本內容只反映影片創作者之立場,與燕子生命一概無關***

1

IMG_1410.PNG

在囚手足能夠接觸外間資訊的渠道寥寥可數,Youtube 機頂盒為每星期從 Youtube 上挑選不同種類的專題影片並製作成謄本、印刷成信件並寄到在囚手足手上的長期計劃。

你唔需要使用真實身份同披露自己地址就可以同手足做筆友喇!

立即登記成為筆友啦!話俾在囚手足知我哋無忘記佢!

其他最新謄本

https-::www.youtube.com:watch?v=TSJwMZvw

《花姐ERROR遊》EP6-Julia的挑戰

ViuTV | 娛樂類

https-::www.youtube.com:watch?v=TSJwMZvw

《花姐ERROR遊》EP5-黐線邊爐

ViuTV | 娛樂類

https-::www.youtube.com:watch?v=TSJwMZvw

《喱騷-尋找他媽的故事》第1季第4集

喱騷 | 娛樂類

https-::www.youtube.com:watch?v=TSJwMZvw

【挑戰】在旺角玩不准做挑戰!情侶互相陷害!對不起害到你!

arhoTV | 娛樂類

https-::www.youtube.com:watch?v=TSJwMZvw

【挑戰】女友摸過的全都買!一摸即買挑戰!最後會破產嗎?!

arhoTV | 娛樂類

0