1

點解城市人咁冷漠?—簡述陌生人/遍地陌生人/隔離措施/禮貌性忽略 [小學雞掃盲包]

Happy Kongner | 哲學類 | Mar 13, 2021

此影片謄本由燕子生命製作

歡迎收睇小學雞掃盲包,我係瘋子愷。
事不宜遲,即刻做返個總結先啦﹕

1.陌生人: 一群無固定居所,但唔係今日來聽日就走嘅過客,佢哋唔屬於「我們」,亦都唔屬於「他們」

2.遍地陌生人: 你有一日起身發現成地都係共產黨解放軍,啊唔係,係一個對都市人來講,我哋係生活喺陌生人之中,而對於其他人來講,我哋自己都係陌生人嘅一種。

3.隔離措施: 唔係講緊中咗中國武漢肺炎嘅陰陽隔離措施,而係減少同陌生人交流嘅方法,最主流嘅方法係「空間隔離法」。

4.禮貌性疏忽: 就係出到街會扮咩都睇唔到﹑聽唔到﹑唔知唔理﹑而且避免同其他人有目光接觸。

以上總結依然都係為咗生活繁忙﹑覺得片太長不了﹑唔想花咁多時間係睇片上,亦都連time slot都唔想拉嘅觀眾事先準備嘅,所以大家睇完呢度可以關咗條片架啦,阻咗你哋咁多時間,真係唔好意思,辛苦晒啦,Bye﹗好啦,想睇落去嘅觀眾唔需要擔心,內容都係會有嘅,等我哋重新開始過啦。

《小學雞掃盲包》呢個節目係一個希望以淺白簡短嘅方式嚟講吓一啲基礎概念或者資訊,幫助大家入門為目的嘅節目。本人會嘗試用最短嘅時間同最content farm嘅方式講一啲社會學嘅概念或者理論。當然啦,呢個節目亦都預咗無人睇,請大家幫手唔好share呢條片啦。

最後都要重申返本人並非專業﹗亦都唔希望扮專業。呢條片嘅主要內容都係由一兩本書度搬字過紙而成嘅姐,基本上只要係識字嘅人都做得到,所以非常低質,都係果句,請唔好對一個廢人做出來嘅嘢抱太大期望,如果無問題嘅話就正式開始今集內容。

上集本人就簡介咗咩係內群同外群啦,仲有略略提過下咩叫想像的共同體,亦都再強調返社會學並唔係啲呀媽係女人嘅理論,而讀社會學最重要都係訓練我哋睇事物嘅思維等等。如果唔記得嘅各位可以睇返上一集。而今集本人就會繼續跟住Bauman嘅Thinking Sociologically嘅內容,繼續講下社會學點睇人與群體之間嘅互動同關係。嗱,每次都會講架啦,大家有興趣都可以搵一搵呢本書,搵完自己睇就可以唔洗再忍受本人呢把咁難聽嘅聲啦。

下載檔案

下載檔案

1

1

營運經費相當貧乏,敬請體諒我們投放少量Google Ads!

1

上次我哋就好簡單咁講過,人喺社會入面會因應同身邊嘅人嘅社會距離而會將人區分開唔同嘅群體,而往往唔同群體有住一種互相對立嘅特質。我哋會發現,我哋之所以有「我們」呢個概念,好大程度上就係因為有同「我們」對立嘅「他們」存在。而呢種清晰嘅分界線係幫助咗我哋建立身份認同,同埋存在意義。但係現今人類社會咁複雜,又點會淨係分內外兩群咁二元呢?我哋會發現,喺我哋身邊不時會出現好多遊走喺「我們」同「他們」之間嘅灰色地帶嘅人存在,而呢班人嘅存在就證明咗我哋一直致力維持嘅所謂分界線並唔係絕對,而係不堪一擊嘅虛構概念。德國社會學家齊美爾(Georg Simmel)就指出呢種出現喺我哋生活入面,但係無辦法將佢哋分類嘅人稱之為「陌生人」(Strangers)。呢度所指嘅「陌生人」並唔係我哋平時理解嘅果種唔係屋企人或者朋友嘅意思,Simmel 指出「陌生人」嘅定義係一群居無定所,但唔係今日來聽日就走嘅過客。咁樣講係有少少抽象,要舉例嘅話就好似中古世紀喺歐洲做生意嘅猶太人,佢哋唔屬於當時歐洲社會嘅任何一個社群入面,但佢哋提供嘅金融服務令當地人無辦法當佢哋唔存在。所以呢個「陌生人」嘅意思並唔係指我哋唔熟悉嘅人,相反佢指嘅係一啲會遊走於唔同社群,我哋認知得到﹑接觸得到嘅人。佢哋物理上距離可能同我哋好近,但社會距離上同我哋好遠。佢哋唔屬於「我們」,亦都唔屬於「他們」,非敵亦非友。所以更加令我哋對呢班人嘅存在感到焦慮。

1

1

如果以香港作為例子,出現喺香港嘅陌生人可以諗成係每日150名額嘅大陸新移民。無人知佢哋嘅背景、政治立場,淨係知不論黃絲定藍絲都會因為有唔同嘅原因而唔中意佢哋。而更加令人焦慮嘅原因,係佢哋出現喺街嘅時候,我哋根本無辦法一下子就分辨出佢哋係唔係新移民,但佢哋的確已經喺唔同嘅社區生活緊。

陌生人嘅特質就係佢哋本身有一種模糊嘅成份,佢哋夾喺內群同外群之間嘅灰色地帶,換句話講就係佢哋兩面不是人。而陌生人另一個特質就係佢哋唔熟悉我哋好多一直以來視之為理所當然嘅生活方式或者各種約定俗成嘅常規。而佢哋若果對呢類所謂常識提出疑問,就會令透過「常識」來建立安全感嘅當地人動搖,開始感到不安。所以總括嚟講,陌生人好容易就會受到社會唔同社群嘅排斥同夾攻。

所以顯而易見,無論我哋本身身處緊一個點嘅社會群體,社會大部份嘅人都會傾向唔歡迎呢種「非我族類」嘅陌生人。人類嘅歷史上就有唔少排除外來者嘅措施出現過,可能係遣返,極端一啲嘅可能會種族滅絕,但係比較常見嘅就係分開政策(Separation)。分開政策通常都係令保留某一個地方比某一個族群嘅人生活。亦可能有硬性嘅法律上嘅配套令佢哋根本無辦法離開佢哋嘅社區,亦都有可能係一種軟性嘅做法係容許佢哋自由進出唔同地區,但唔阻止當地人歧視佢哋而令佢哋知難而退。

1

1

不過,到咗今時今日,對於生活喺人口密集大都會嘅人來講,每日接觸或刷身而過嘅人多不勝數,根本無辦法完美咁將接觸嘅每一個人都將分門別類。我哋發現其實我哋已經置身於一個被陌生人佔據嘅世界,而呢個現象就稱之為「遍地都係陌生人」(Universal Strangerhood)嘅世界。意思姐係有人同你講: 「陌生人好恐怖架﹗你一覺訓醒,成地都係陌生人啊﹗」呀唔係,係講緊呢個情況之中,我哋生活喺陌生人之中,而同一個道理,對於其他人來講,我哋自己都係陌生人。

呢個情況嘅出現令我哋一直以來想同佢哋分隔開嘅如意算盤打唔響,所以我哋似乎只可以諗下大家點樣減少社交嘅機會,呢啲行為就叫「隔離措施」(Segregation)。第一種就叫外表隔離法(Segregation by appearance),簡單嚟講就係因為喺以前嘅社會,唔同身份嘅人通常都有著代表到佢哋嘅衣著,所以一睇就分到佢係咩人。但講得以前,咁而家就緊係行唔通啦。隨住各式各樣嘅衣著服飾都愈來愈大眾化,大家都可以著一樣嘅衫,服飾呢樣嘢失去咗地域特色。而另一方面,服飾更加被我哋重新定義,變成一種用來表現自我特質嘅工具,令到我哋可以隨自己喜好定義自己係邊一個群體嘅人。就好似班長佢無論去到邊到都會著槍會件衫,其實亦都等於佢透過選擇自己嘅衣著嚟話畀人知佢中意玩氣槍呢樣嘢啦。

1

1

咁既然靠外表行唔通啦,就只能靠空間去區分啦。所以下一個最廣泛被使用嘅方法就係空間隔離法(Segregation by space)。空間隔離法簡單嚟講,就係我哋而家習慣會將都市分成唔同區域,而同一個區域入面多數會出現特定一類人,而好少出現某啲種類嘅人。呢種具排他性嘅篩選行為,雖然我哋分完區都無辦法避免我哋生活喺陌生人當中,但係至少可以安全地假設,果個區嘅陌生人大致屬於同一類人。就好似一講到深水埗,可能大家就會聯想到窮人區; 一講到淺水灣就會諗到係有錢人區。甚至有啲時候我哋會利用權力來建立特定門檻去篩選可以入果個區域嘅人。例如某啲地方可能要買飛,或者有特定條件先會被大門嘅保安放行入去,亦姐係話保安有權決定陌生人有無資格入去。而呢個守門嘅過程就好似係將一啲位於灰色地帶嘅陌生人,變成一個「具形的人」、一個「有面孔的人」。所以入得去嘅人自然就會感到安心,因為內部嘅人已經經過分類,某程度上被「淨化」完。就好似如果你有馬會會員可以入貴賓區,你喺入面就感到比外面龍蛇混雜嘅環境安心得多,因為你清楚要入呢個地方就要有相應嘅資格。

其實陌生人呢個概念已經融入我哋嘅社會當中,而遍地陌生人已經喺我哋不知不覺之間改變咗人類喺都市入面嘅生活模式。美國社會學家高夫曼(Erving Goffman)發現,都市人都不知不覺咁練成咗一種技術: 禮貌性疏忽(Civil Inattention)。禮貌性疏忽其實大家每日都做緊,就係出到街會扮咩都睇唔到﹑聽唔到﹑唔知唔理﹑而且避免同其他人有目光接觸。我哋有種不成文嘅規定係我哋嘅目光只可以喺陌生人身上一閃而過,而唔可以聚焦咁望住,因為我哋會認為「啤」住一個人係一種冒犯﹑無禮貌嘅行為。所以我哋為咗同陌生人保持社交距離,我哋不知不覺咁學習咗一種冷漠嘅待人處事態度,令到好多都市人都會覺得寂寞,因為我哋大家嘅物理距離再近都好,人與人之間嘅精神距離都隔得好遠。

今集嘅內容就咁上下啦,今集嘅內容可能有少少抽象,但有時理論就係咁架啦,需要大家親身經歷同消化嘅。同埋以上內容都係經過本人嘅簡化同部份個人演繹而成嘅,所以如果有唔明不妨試下自己睇書搵資料啦,本人下次有機會再睇下有無補充啦。大家記得唔好share啦,我哋下次見,bye!

***謄本內容只反映影片創作者之立場,與燕子生命一概無關***

1

IMG_1410.PNG

在囚手足能夠接觸外間資訊的渠道寥寥可數,Youtube 機頂盒為每星期從 Youtube 上挑選不同種類的專題影片並製作成謄本、印刷成信件並寄到在囚手足手上的長期計劃。

你唔需要使用真實身份同披露自己地址就可以同手足做筆友喇!

立即登記成為筆友啦!話俾在囚手足知我哋無忘記佢!

其他最新謄本

https-::www.youtube.com:watch?v=TSJwMZvw

《花姐ERROR遊》EP6-Julia的挑戰

ViuTV | 娛樂類

https-::www.youtube.com:watch?v=TSJwMZvw

《花姐ERROR遊》EP5-黐線邊爐

ViuTV | 娛樂類

https-::www.youtube.com:watch?v=TSJwMZvw

《喱騷-尋找他媽的故事》第1季第4集

喱騷 | 娛樂類

https-::www.youtube.com:watch?v=TSJwMZvw

【挑戰】在旺角玩不准做挑戰!情侶互相陷害!對不起害到你!

arhoTV | 娛樂類

https-::www.youtube.com:watch?v=TSJwMZvw

【挑戰】女友摸過的全都買!一摸即買挑戰!最後會破產嗎?!

arhoTV | 娛樂類

0