1

臺灣民主國真係好「民主」?超簡略台灣史—台灣民主國 [做乜嘢懶人包]

Happy Kongner | 歷史類 | Mar 13, 2021

此影片謄本由燕子生命製作

大家好,我係米迦,歡迎大家收睇《做乜嘢懶人包》。上一集《超簡略台灣史》嘅迴響都叫做同我想像中差唔多,當然我就唔預會有好多人會想睇嫁喇,不過大家都知我一向都係抱住一副「一蓑烟雨任平生」嘅心態寫稿整片嫁喇,所以唔使擔心,呢個《超簡略台灣史》系列我都會繼續做落去嘅,重記得我哋上次就講到呢個亞洲有史以來壽命最短嘅共和國「台灣民主國」嘅出現做收尾,咁究竟呢個「台灣民主國」又係啲乜嘢嚟嘅呢?當時嘅臺灣巡撫,亦姐係「台灣民主國」大總統閣下唐景菘同一眾台灣鄉親父老又打緊啲乜嘢算盤呢?一切又要從建國之前甲午戰爭台灣嘅情況開始講起。

一開始就要返到去一八九五年嘅四月,上集我都講過因為甲午戰爭清廷打輸咗俾日本嘅關係,清廷係需要割讓台灣俾日本,而其實早喺戰前,姐係一八九四年果陣,清廷一早都知道日本係對台灣虎視眈眈,所以就派咗福建水師提督楊岐珍同南澳總兵劉永福去台灣進行協防事務,同時當時嘅臺灣巡撫邵友濂亦都請咗台灣本地嘅士紳組成民團嚟進行團練,佢揾到嘅其中一位就係我上集提過嘅豪族林本源一家家主林維源同埋另一位仕紳林朝棟嚟搞呢樣嘢。而林維源喺組織地方義勇嘅時候,就揾上都係我上集講過嘅客家鄉紳丘逢甲嚟一齊搞呢個地方義勇計劃。

下載檔案

下載檔案

1

1

營運經費相當貧乏,敬請體諒我們投放少量Google Ads!

1

當時丘逢甲早已經睇得出甲午戰爭嘅後果有機會禍害到台灣,所以佢就對住鄉里講:「臺灣孤懸海外,一但發生不測,朝廷無可能顧及到臺灣。我哋唯有自己守住自己嘅屋企,否則一但禍患嚟到,唔單止係祖先埋骨之地會蒙難,我哋亦都會失去家園。」就係咁,佢就吸引咗好多台灣本地嘅熱血青年加入佢哋嘅團練計劃。咁無幾耐之後,邵友濂就走投,換咗唐景崧過嚟做臺灣巡撫。

而講返唐景崧本身,根據美國夏威夷大學嘅藍厚理教授所講,佢認為唐景崧係一個具有雄心壯志嘅官員,因為佢一直都喺台灣事務上面扮演一個主導者嘅角色。無錯,唐景崧喺治理台灣嘅期間,其實從來都無同之前被朝廷派嚟協防台灣嘅楊岐珍同劉永福商量過任何有關嘅事務。就算係本身駐守喺台南嘅劉永福專程去到台北拜訪唐景崧,同佢商量有無乜嘢軍務上嘅嘢劉永福係可以幫手,但到最後唐景崧都係堅持要劉永福做返自己嘢,留返喺台南,呢樣嘢應該就係因為唐景希望同劉永福分返開兩邊劃地分防。

當時丘逢甲同清廷時任南洋大臣張之洞都勸唐景崧唔好咁硬頸,因為佢哋都認為如果無劉永福嘅幫助係守唔住台北,但係唐景崧都係抱住一副睬你都傻嘅心態做嘢,而同時佢亦都將林維源同丘逢甲兩個負責嘅團練,完全交哂俾佢嘅門生丘逢甲去做,將團練團改名做「義軍」,自此丘逢甲就成為咗義軍嘅領袖。

而去到一八九五年三月二十三日,日軍登陸澎湖,淨係用咗三日就佔領咗澎湖全島。當呢個消息傳到去台灣本島果陣,唐景崧為咗穩定台灣人民民心,佢就緊急調丘逢甲返北上駐防,但唐景崧亦都因為丘逢甲甲係本地具有影響力嘅仕紳,佢認為佢好難掌控得住丘逢甲,所以唐景崧對丘逢甲嘅好多要求大多都唔配合,例如丘逢甲想要武器補給,唐景崧就送咗一堆唔係生鏽就係甩頭甩尾嘅殘舊大砲俾佢;丘逢甲想要出糧俾義軍嘅人,唐景崧就立即耍手兼擰頭,令到丘逢甲經常因為呢件事挑蝦拆蟹。過咗無耐,清日兩國簽訂咗「停戰協議」,但最好笑嘅就係,喺呢份「停戰協議」入面,停戰嘅地方係唔包台灣,呢樣嘢又令到台灣人民感到十分震驚。又話係中國自古以嚟不可或缺嘅領土嘅?咁當然呢句係我加嫁啦,不過喺呢個時候,丘逢甲就認為台灣嘅利益可能俾當時嘅北洋大臣李鴻章出賣咗,但清廷依然對台灣人隱瞞事件嘅嚴重性。

去到四月二日,清廷軍機處向台灣發出訓令,表示出朝廷對台灣嘅關懷,並要求唐景崧要「激勵將士,開導紳民,敵愾同仇,力圖捍禦」。不過同時喺台灣嘅洋行就傳出日本將會要求清廷割讓台灣,本來組織全台軍隊進行防務嘅唐景崧知道之後就嚇到飛起,立即上書向朝廷詢問真相,但朝廷嘅回覆就係顧左右而言他,避而不答。

去到四月十七日,唐景崧透過張之洞嘅通水,先知道嚟緊清廷同日本簽訂嘅條約上面係的確有割讓台灣呢個條款。呢個消息傳咗開去之後,作為當時台灣本土份子嘅丘逢甲當然就係嬲到核爆,當場就拮手指寫血書寫咗「拒倭守土」四個大字以表示佢抗日保台嘅決心。之後果日,佢就率領一大批鄉紳父老去揾唐景崧,上書清廷請願,強調佢哋「願與撫臣(姐係唐景崧)誓死守禦」,如果打唔贏,就等佢哋死哂之後再講割地,如果日本嚟接收台灣,台灣人民一定會同日本開戰。

一日之後嘅四月十九日,總理衙門就Send個份電報(下面我會用Send Message嚟代替) 嚟講割讓,呢份電報入面唔單止係無安撫台灣人民,重提到要唐景崧喺同日本交收台灣果陣要極力保護日本過嚟接收領土嘅人,要求佢令到百姓唔會生事。老老豆豆,清廷對台灣一副關人隱士四隻大字嘅態度,再加上台灣係無啦啦俾人割俾日本,咁台灣嘅民眾又點可能唔情緒激動呢?因此就喺當日,以丘逢甲為首嘅嘅台灣仕紳豪族鄉親父老二百幾個人就喺艋舺集會,主張清廷都既然拋棄台灣,以後對邊個忠誠應該由返台灣人自己話返事。喺集會入面佢哋同時呼籲唐景崧要留喺台灣,認為只有靠佢同清廷嘅關係,佢哋先會得到資源同協助。

呢個時候唐景崧見到咁就滴哂大汗,因為佢個處境十分尷尬,佢只不過係嚟台灣做官嫁咋嘛,又唔係台灣本地人,佢又點會同你過人世呢?因為佢根本都唔會體會到班仕紳豪族鄉親父老嘅故鄉
依然被割讓俾日本仔嘅痛苦同屈辱。因此當佢知道《馬關條約》要簽訂之後,其實佢一早就想走投返大陸,但係依家風頭火勢走唔到咁解嘅姐,所以佢唯有揾靠山,而佢揾到最好嘅靠山就係當時嘅南洋大臣張之洞。根據台灣歷史學家現任台灣國立故宮博物院院長吳密察嘅研究指出,張之洞早喺一八九四年十一月果陣,聽到日本政府話想要台灣呢個地方嘅時候,就早已向李鴻章強調絕對唔可以放棄台灣,重提出咗喺台灣「給予各國利權,結援列強來抵抗日本」。

而去到一八九五年二月,清廷派李鴻章去日本談判果陣,張之洞喺二月二十七日就Send 咗個Message俾唐景崧同佢講叫佢上奏朝廷,同朝廷講叫佢哋唔可以輕易放棄台灣,然後張之洞自己都Send 咗個Message俾北京總理衙門同埋李鴻章同佢強調台灣嘅重要性,並且提出咗一個方法去解決台灣俾日本食咗嘅問題,就係將台灣抵押出去當成向外國借款嘅抵押品,將台灣變成一個國際債務責任,去誘使債權國家去抵抗日本嘅要求,同時又將台灣開礦嘅利益俾埋呢啲外國債權國家,咁自然呢啲外國債權國家就唔會想將台灣交俾日本喇。咁張之洞心目中嘅「外國債權國家」係邊個呢?就係當時嘅日不落帝國,大不列顛帝國喇。當時嘅英國幾乎喺台灣完全獨占哂台灣嘅金融、貿易、航運同採礦業,因此張之洞嘅如意算盤就係想將台灣押俾英國,借英國會接管台灣呢個地方嚟杜絕日本想食咗台灣嘅呢個諗法。所以去到三月七日,清廷就問張之洞有無橋果陣,張之洞就立即聯絡咗駐英公使同駐俄公使分別密斟。

首先俄佬就同張之洞講話佢哋無興趣用武力兇日本,而英國佬就話英國政府唔想插手呢件事,但如果啲英國商人同公司想做啲乜嘢嘅話,英政府就唔會阻止啦。張之洞隨即要求駐英公使去試探下啲英國商人嘅口風,但到最後都得唔到任何確實嘅回應,

簡單啲講就係,張之洞呢個如意算盤係打唔響。

去到馬關條約簽訂咗三日之後,姐係四月二十日,台灣仕紳見好似無乜起色,又再集體上門揾唐景崧,希望佢可以出面同當時英國代理領事金璋傾下有無得請求英國保護台灣,但同時唐景崧依然係想走佬返大陸,佢反而係拜託英國商人睇下有無辦法幫佢將佢嘅個人資產變賣然後運返返大陸。咁當然無論係仕紳定唐景崧嘅私人要求都好,英國佬就梗係睬你都生芒果啦。

喺同一日,反對割讓嘅台灣民眾打鑼打鼓咁呼籲大眾罷市以表達抗議,台灣人民嘅情緒變得十分之激動。而喺同一個時候,清廷派咗去法國巴黎同法國佬交涉嘅欽差大臣王之春就Send 咗個Message俾唐景崧同張之洞,同佢哋講西史。無錯真係講西史,就係好出名嘅普法戰爭後嘅和談。當時作為勝方嘅普魯士就求法國割讓兩個地方俾佢哋,就係我諗大家對中學歷史堂有記憶嘅都應該會聽過嘅,阿爾薩斯同洛林呢兩個省,但法國佬就認為呢兩個省嘅人民唔願意歸順於普魯士,普魯士當時係無辦法反駁佢哋。就咁睇,王之春嘅提議好似好唔錯咁,不過唔知王之春嘅西史係咪又係好似我哋個教育制度咁讀啲唔讀啲,因為如果你睇返普法戰爭後和談及後簽嘅《法蘭克福條約》就知,法國佬最後係要將阿爾薩斯省嘅大部分土地同洛林省屬下嘅摩澤爾省割讓俾德國佬,而且法國重要喺四十九年入面賠返五十億法郎俾德國,然後喺未還得哂之前必須接受德國佬佔領自己嘅北部地區。啲條款其實到最後都係一樣咁嚴苛,不過當然呢啲嘢王之春唔講,唐景崧同張之洞就無可能知嫁啦,所以喺王之春身上上咗一堂「西史堂」嘅唐景崧,就分別Send Message俾張之洞同埋總理衙門,佢喺Message入面就提到話「台民不服,其約《馬關條約》可廢」,同時張之洞又Send Message俾總理衙門同唐景崧,進一步提出可以用台灣「百姓不願遵從抵拒日本」,重話「清廷應該聽任臺灣住民嘅意願」。嚟講出唔應該割讓台灣嘅意思。之後唐景崧就收到張之洞轉發,嚟自總理衙門嘅來信,就話如果台灣可以自保嘅話,咁就唔會連累到清廷,如果重可以得到英國佬嘅庇護咁重好,可以自立保民,又話要請英國佬嚟幫手協防之類,呢啲說話似乎都好似係喺度鼓勵緊台灣自立一樣。

不過民間就唔係好似啲官咁諗喇,由《馬關條約》簽訂果日開始,台灣就立立亂,又殺人放火打劫破壞乜都齊,咁為咗處理呢個社會混亂嘅情況,唐景崧喺四月二十五日召開咗一個會議,希望建立一種「台灣之所以咁立立亂都係因為啲人民對割讓不滿」嘅認知嚟尋求各國協助。因此佢就喺會中同清廷在台官員、英美德三國領事同埋清廷外國顧問馬士等人表明,如果履行呢個割讓嘅條款嘅話,叛亂嘅士兵同人民將會喺日本人到達之前奮力反抗,包括佢在內嘅所有清廷官員都好大機會會被針對性攻擊或者殺害,咁到時佢哋無能力保護外國人喺台灣嘅生命安全。同時,佢喺會上亦都公佈咗一個嚟自一位北京中央官員嘅「好消息」,斷估都應該係張之洞嫁喇,消息指各國可能對此干預,阻止條約通過割讓台灣。

1

1

而的確喺四月二十三日開始,俄、德、法三國就真係開始干預清日談判,呢個就成為咗台灣上下官民嘅最後期望,不過我哋當然知道嘅就係,俄、德、法三國干預嘅結果都只不過係要日本嘔返出接近京畿嘅嘅遼東半島,姐係後嚟嘅「俄、德、法三國干涉還遼」,不過箇中最得意嘅就係法國佬嘅取態。法國佬一向都對台灣好有興趣,所以清廷靠住王之春嘅遊說,的確係說服咗法國保台。法國隨即調派法國軍艦開赴基隆同淡水,並且著人經西班牙發咗個電報俾日本話就算兩國批准咗和約,佢哋都係唔會承認。

不過後嚟法國佬嚟態度又改變咗,又話條約已簽形勢已定無法改變,所以保台不了。因此去到最後《馬關條約 》依然都係喺五月八日喺煙台完成換約,及後正式生效,但唐景崧依然對法國佬充滿信心,認為只要法國派艦隊過嚟保護台灣,就能夠阻止日本佔領台灣。喺五月九號果陣,當唐景崧重係對法國佬有期望嘅時候,馬士就立即提醒唐景崧,佢就話如果無足夠嘅海軍軍力嘅話,
法國嘅行動就只會引起不良嘅後果,而呢場暴動到最後都係會波及到唐景崧。

喺呢個時候,唐景崧就有另一個打算。

呢個時候唐景崧就問馬士,佢就問:如果宣佈台灣自治嘅話,會唔會惹嚟日本嘅譴責呢?馬士當然予以反對,就話:如果按住民國(民主共和制),同清廷無關嘅話,光緒皇帝就唔會被譴責,但責任依然都會係喺唐景崧身上,因此必須要加以防止。同時馬士亦都暗示,如果唔抵抗日本嘅話,一但當台灣發生暴動都好,英德兩國領事館都會保佢,佢其實係唔使怕嘅,所以馬士其實真係勸緊唐景崧唔可以咁貿然決定自治,但唔知係咪因為馬士係鬼佬嘅關係,講官話講得唔好,佢講嘅呢堆嘢,唐景崧到最後就可能只係聽得到要採取「民國」方式自治。

五月十日,法國駐清公使表明因為《馬關條約》經已換約,法國唔會再干涉嫁喇。唐景崧見法國佬咁絕,所以過咗兩日之後又再叫總理衙門揾德國佬幫手,但德國佬好快就拒絕咗喇,然後唐景崧向埋三國最後嘅俄佬嗌救命,但俄佬因為喺大陸東北有利益嘅關係,所以俄佬都唔想插手保台。呢堆求助其實都係經總理衙門發放出去俾各國領事,咁姐係代表清廷係知道台灣嘅嘢,而因為佢唔方便公開反口唔認數,所以佢哋只能夠暗地允許張之洞同唐景崧用任何檯底下嘅方法喺去確保台灣唔會被日本攞走,利用台灣人民嘅名義去做就唔關清廷事喇。不過問題在於,清廷又同時唔想損害佢哋同日本嘅關係,所以無意之中就容許台灣可以自作主張,而隨住局勢嘅發展,台灣人民做嘅嘢就只會越嚟越激進嫁姐。

五月十五日,以丘逢甲為首嘅台灣仕紳揾唐景崧密談,講明佢哋嘅抗敵計劃,並且要求唐景崧提供資金同武器,喺會議之後,大家都要求唐景崧發表聲明譴責日本侵略嘅行為,並宣稱佢哋將會抵抗日本人登陸。同時佢哋亦都要唐景崧Send 個Message俾張之洞,代轉發一份叫做《臺民布告》嘅聲明俾清廷:我就唔讀啦,想就自己睇。總括嚟講,成篇嘢最重要都係三點:
一、自己台灣自己救,因為台灣無人幫,所以台灣人民唯有自己幫自己;
二、「願人人戰死而失臺,絕不願拱手而讓臺」;
三、有邊個國家如果承認台灣自立同時又共同援助協防台灣嘅話,佢哋就會租借所有金礦、煤礦、田地同可以起嘢嘅土地出去俾果個國家。

1

1

之後又發電報俾總理衙門、北洋大臣李鴻章,南洋大臣張之洞、時任閩浙總督、福建布政使同埋全台灣官員,表明因為台灣已經成為咗「朝廷棄地,百姓無依,唯有死守」因而要決定要「自立建國」。

一連串嘅行動之後,五月十六日,台灣仕紳請求唐景崧暫理台灣政事,但唐景崧拒絕。唐景崧之所以拒絕嘅原因,就係同佢嘅門生丘逢甲有關。因為丘逢甲當時可以話係喺台灣綁紳入面最有權勢嘅人,如果唐景崧跟邱逢甲嘅要求行事嘅話,佢就唔係留低擔任領導者,而係被扣押嘅人質,咁佢就唔單止無咗去咗清廷「巡撫」嘅權威,亦都無辦法成為台灣島上面唯我獨尊嘅抗日領袖。而最好笑嘅就係,唐景崧之後果日又Send 咗個Message俾張之洞同佢講話台灣準備要以「民主」嘅形式自立建國,而且佢重話佢已經被班仕紳推舉做領導人,雖然佢堅決唔做,但得唔到仕紳父老准許,但佢又同時擔心朝廷會怪罪,於是佢要想張之洞幫手同朝廷講話:「台灣之所以要建立民主國,完全就為咗唔想等日本有藉口嚟騷擾清廷」,但同時佢又怕「民主」呢個字眼對清廷嚟講太過新奇,所以佢希望朝廷可以俾個「名份」,等佢都有個揸拿喺手,最後佢亦都強調台灣「自立建國」呢件事係救急之策嚟,唔係作反。而喺呢個時候,唐景崧一早已經放棄咗等嘅法國軍艦竟然突然出現,雖然法國無派到艦隊嚟,就只係派咗隻巡洋艦,但對於喺當時急需外國勢力協助嘅台灣嚟講係一個好消息。

其實自從清廷喺收到台灣自立建國嘅消息之後,佢哋就已經開咗個御前會議,但到最後都無任何結論,去到五月十七日當收到唐景崧轉發張之洞表明台灣要建立民主國嘅Message果陣,呢個時候李鴻章亦都借機建議日本還返台灣俾清廷,但日本就梗係唔會同意啦。而李鴻章亦都怕咁樣會搞喎咗日本會還返遼東半島俾清廷嘅呢件事,所以佢亦都上奏朝廷,叫朝廷諗清諗楚先好做台灣嘅決策。因此去到五月十八日,清廷就要李鴻章養子,駐日公使李經方去台灣,依約將台灣交俾日本。

五月十九日,前德國駐清公使巴蘭德就Send 咗個Message俾李鴻章,表示德國方面都認為李鴻章係度指使台灣人民反抗日本,明顯係違約,咁樣必定會令到日本再次開清廷波。李鴻章一睇到呢個message之後,就立即向總理衙門反應,造佢係無辜嘅,並且駁斥佢無暗中指使台灣人抵制日本,佢篤灰話呢個就只係張之洞同唐景崧嘅所作所為。同時,德國外交部亦都直接Send 咗個Message俾總理衙門指責清廷唔應該暗下命令要台灣人反抗日本,而且德國佬警告如果清廷再次同日本開拖嘅話佢哋只會又輸一鑊然後賠更加多錢。清廷收到嚟自國外嘅警告之後,更加唔想放任台灣嘅反抗活動,所以係同一日,佢哋就向外界宣告佢哋係無唔想交割台灣嘅意思,並且再度催促李經方快啲去台灣,更加要李鴻章將台灣嘅事話俾日本知。同時清廷喺五月二十日Send 咗個Message俾唐景崧,免除佢巡撫嘅職務,並且要佢立即離開台灣返去京城,而且亦都下咗內渡令,Call 齊所有在台上下大小文武百官都要離開台灣返返大陸。清廷咁樣做,大多都係因為佢哋真係唔想唐景崧因為一個小小嘅台灣而誤咗全盤大局,所以就正式向各國表明清廷係同台灣自立無關,亦都因為咁,清廷對於日後台灣抗日嘅行動就無辦法有名義上甚至實際上有任何嘅援助。

跟住成件事就返到去我上一集所講嘅法國軍官訪問唐景崧嘅呢件事上面。

唐景崧當時就宣稱話法國佬同佢講話如果台灣自立建國嘅話,法國就會派全權大臣嚟台灣簽約。然後唐景崧又話佢當日又收到一份嚟自總理衙門嘅電報,敦促唐景崧盡快進行台灣自立嘅行動。因此當時丘逢甲等人再次請求唐景崧做台灣嘅領導人果陣,佢就順勢接受咗喇。而喺五月二十五日,唐景崧就發表咗「台灣民主國」嘅建國獨立宣言,全文就係咁嘅:總之簡單啲嚟講嘅就係:
一、台灣民主國嘅成立就係為咗抵抗日本嘅侵略;
二、列強唔肯幫手咁唯有自救;
三、台灣人民願意為保持台灣而戰;
四、台灣人民決議要建立「民主國」,
推舉唐景崧為「總統」。呢個建國獨立宣言,就姐係等於同全台宣告《馬關條約》無效,呼籲全台灣人民捍衛台灣。

就係咁,台灣喺局勢所逼同張之洞嘅支持之下成立咗台灣民主國政府,

但實際上張之洞對於成立「民主國」新政府呢樣嘢有所顧忌。因為早喺收到唐景崧嘅報告之後,
張之洞曾經質問過唐景崧問佢建國呢樣嘢係想點做,而唐景崧就答張之洞佢會仿照西洋制成為「總統」。張之洞反對,佢喺二十四號果日就Send 咗個Message同唐景崧講話新政府唔可以叫做「民主」、「自立」,而且亦都唔可以叫做外國嘅「總統」,因為權位太大,並唔合適,要改名叫做「總管」或者「總辦」,但呢個Message Send得太遲,喺五月二十五日果陣台灣民主國一建立就已經實行咗總統制。

不過名義上叫做行西式體制,但骨子裏嘅嘢依然都係無變。點解咁講呢?

我哋從佢哋成立咗「台灣民主國」嘅言行舉止就知道喇。例如喺建國宣言上面嘅果一句「今須自立為國,感念列聖舊恩,仍應恭奉正朔,遙作屏籓」,所謂嘅「正朔」又係指乜嘢呢?咁就當然係指清廷啦,咁就可以見到呢個「民主國」有幾獨立。而且一成立咗「台灣民主國」之後,以丘逢甲為首嘅台灣鄉親父老去原本係巡撫衙門嘅總統府向唐景崧兩跪六叩,向佢呈上「台灣民主國」嘅國旗同寶印。台灣人民走去跪佢哋嘅總統都算,最搞笑嘅就係唐景崧唔知點解會著住清廷嘅朝服,向住北京方向九叩首,而接任總統之後唐景崧第一樣做嘅嘢居然係哭𠹌佐,無錯真係當場大喊,話佢自己本身應該係清廷官員,做到咁都只係身不由己。而另一樣好笑嘅嘢就係,唐景崧明明宣佈「台灣民主國」係「自立」體制,但佢哋就唔知點解會有個只有有君主嘅地方先會有嘅年號,而且個年號重要叫做「永清」,姐係「永戴聖清」,意思姐係佢哋係無從清廷脫離獨立嘅意思,並且用老虎做國旗嘅意思亦都係代表佢哋都依然係臣服喺大清帝國國旗上嘅龍。而喺建國儀式之後,唐景崧係以「台灣民主國總統・前署台灣巡撫布政使」嘅名義嚟發表頭先嘅「臺灣民主國獨立建國宣言」,姐係證明唐景崧實際上根本都重有做清廷臣子嘅心,「台灣民主國總統」呢個名就只不過係一個權宜之計,所以唐景崧其實係有兩副官印。

1

1

而且張之洞亦都提醒唐景崧,通報消息同行文俾清廷嘅時候都係要用「巡撫」嘅頭銜,對住啲鬼佬先用返「總統」呢個頭銜。同時唐景崧迅速Mass Message 俾清廷治下嘅各個省份,講到明佢嘅舉動就只不過係權宜之計,事情搞掂之後台灣依然都係大清領土,佢知道佢呢個行為喺事後係會被判死刑或者被嚴懲,但佢依然都不斷重申喺適當嘅時候會返京接受應得嘅懲罰,但佢仍然希望可以喺台灣保留權力,並且驅逐日本人,直到台灣嘅事有轉機為止。簡單啲嚟講就係,唐景崧作為「台灣民主國」嘅總統,喺台灣一直都處於一個咁不利嘅環境之下,佢從來都無一個長遠計劃,無論係建立一個新嘅王朝又好,定係成主一個主權嘅民主國家都好,其實佢都無諗過。

實際上,佢咁冒險喺台灣做抗日領袖嘅呢樣嘢,與其係話為咗台灣嘅未來,倒不如係話佢係一心想解決清廷嘅問題,然後返清廷做官。而事實上,喺唐景崧建立嘅新政府入面,丘逢甲就只係得個名銜而無被委派任何嘅要職,喺南方駐守嘅劉永福都只不過係一個掛名嘅大將軍,「民主國」新設立嘅內政、軍事同外交三個新衙門都係由唐景崧三位親信去做大佬,三個部長所執行嘅都係一啲重疊嘅職務而且重要互相協助,而佢哋所決定嘅事務到最後都係需要經由唐景崧決定先可以出台。

而雖然呢個新政府係有設立議院,但係呢個議院就從來無開過會,而台灣民主國本來就無制定過任何憲法,只係得促成台灣民主國嘅人士所制定嘅一啲建國方針。簡單啲講姐係成個政府嘅大權都係依然掌握喺唐景崧手中,所以台灣民主國實際都係一個臣服於清廷呢個帝國之下嘅偽「民主國」。咁外國又點睇呢?列強無一個對此有任何特別反應,除咗一個國家,就係位於北美洲上面嘅花旗國阿美利堅合眾國,姐係美帝喇!美帝係極唔願意見到日本攞唔成台灣,呢個就同當時美帝一直都幫助日本取得台灣嘅呢件事有關,不過呢樣嘢就要留返下一集先再講喇。總而言之就作,美帝嘅駐廈門領事金德渥一知道台灣自立成為「台灣民主國」嘅呢一件事之後,就立即Send 電報返去國務院,而喺六月中果陣,金德渥甚至斷定台灣自立成為「台灣民主國」嘅呢一件事係出自清廷授意嘅行動,妄圖令《馬關條約》難以實行,佢就認為呢一個係一個極之傻仔嘅行為。因為金德渥好明顯就知道,清廷咁樣玩嘢,到最後都係只會又俾日本打鑊金。

無錯,日本喺甲午戰後威震東亞,而且同時又有美帝支持進佔台灣,佢哋好早就知道台灣人係反對割讓,並組織力量對抗果陣,就已經決定咗會需要動用到軍隊去接收,因此佢哋就派咗近衛師團同常備艦隊準備向台灣進發。

喺五月十日,日本正式任命海軍中將樺山資紀做首任台灣總督,以進行接收台灣及澎湖嘅工作。樺山資紀一開始就組織總督府成員,初步完成組織之後,就立即指示將總督府嘅位置設喺台北,所以日本嘅第一步接收目標就係台北,所以佢哋就計劃喺淡水登陸。

五月二十三日,樺山資紀就帶住一眾文武官員由京都南下,喺兩日之後就同近衛師團喺沖繩會合,同一日就係台灣民主國成立嘅日子,由長崎出發嘅常備艦隊去到淡水,喺附近查探果陣就發現淡水港滿佈台灣民主國嘅士兵,所以到最後佢哋就決定喺一個叫澳底(姐係依家新北市嘅貢寮)登陸。當時唐景崧對台灣兵力嘅部署,將重兵集中喺佢自己所在嘅台北附近嘅基隆淡水一帶同埋澎湖。咁日本人都唔係碎料嚟嫁嘛,佢哋針對台灣兵力嘅部署,嘗試喺南部嘅瑯嶠姐係恆春登陸,因此唐景崧就命令劉永福帶兵駐守恆春同東港一帶。另外為咗防範日軍喺南崁登陸,從背面攻略台北,唐景崧亦都派咗由台灣仕紳丘逢甲嘅義軍同林朝棟嘅棟軍去駐守南崁、新竹一帶嘅地方。詳細嘅情形就唔講喇。呢啲打仗嘅細節留返俾大家自己揾資料睇。

總之去到六月頭果陣,日軍進佔基隆,隨即就通知各國領事,宣布日本正式執行接管台灣嘅工作,而佢哋亦都保證會極力保障各國喺台灣嘅商務利益。金德渥立即回覆日本,指出佢相信以後台灣茶葉經由廈門轉運到美國嘅業務唔會有啲咩新嘅阻礙,佢亦都批評清廷嘅官員刻薄無禮,因此好樂意見到日本成為台灣嘅統治者。而台灣民主國因為無海軍嘅關係,基本上都唔夠日本打海岸戰,到最後大多數駐守嘅官兵退守內陸。而唔知係咪因為見到大勢已去,去到六月六日,唐景崧同一班官逃離台北潛逃返大陸,台北城因為突然之間群龍無首而陷入一片混亂,兵痞互鬥搶掠,然後一眾台灣富紳外國商人以恢復戰亂秩序為由,邀請日軍入城維持秩序,就此,日軍登陸台灣十日就進佔台北城,北部台灣民主國時代結束,淨返南部以劉永福為領導者嘅殘餘勢力,稱為南部台灣民主國。

六月十三日,美國駐清公使田貝將台灣民主國成立宣言嘅譯文送咗返去國務院,並且台灣民主國係佢見過最短命嘅政府,佢認為台灣民主國完完全全就只不過作出自若干大清嘅官員同台灣仕紳嘅策劃,台灣民間根本對呢樣嘢係漠不關心,因為老實講由日軍被請入城呢樣嘢就可以睇到。而本來喺南進戰線上,日軍同客家義民軍嘅交戰係十分膠著,但因為唐景崧嘅走佬,林朝棟同丘逢甲見到大勢已去到最後都係走佬返咗大陸,劉永福就成為咗當時喺台灣擁有最多兵力嘅華人將領,而本來劉永福因為一向都被唐景崧排擠,又同時無任何清廷官員理佢,佢對抵抗日本一事係無乜動力,直至去到六月二十一日,佢收到嚟自張之洞嘅密函,就話駐俄公使許景澄嘅消息話俄國承認台灣自立,想知黑旗軍會唔會頂到兩個月,又講話「救援將至」之類嘅說話,令到劉永福抗日嘅態度先轉變為積極行動。

六月二十五日,樺山資紀就寫咗封信俾劉永福勸佢投降,但劉永福立即回咗句不了,劉永福喺回覆中強調「台灣民主國」嘅實際本質係為咗防止日本佔領清廷領土嘅手段,佢嘅效忠對象由此至終都只係得清廷。我哋當然係唔知點解劉永福咁坦白,但就因為佢咁坦白,結果就擺咗自己上檯。當時劉永福其實係靠張之洞當時果時果句救援頂落去,因為黑旗軍嘅後勤物資係極為不足,需要錢去解決呢個問題,但問題在於俾日本知道你劉永福食嘅係清廷水,咁佢哋重唔喺外交上抗議你咩?結果劉永福兩個月內三度向張之洞求助,張之洞都係不了。到最後張之洞直程因為清廷俾日本乍型而佢就俾清廷乍型,不但止言明唔再援助台灣,重話會幫日本查禁從大陸運去台灣嘅兵草糧馬。而劉永福直接揾佢嘅心腹易順鼎去揾張之洞搲果個援助,張之洞依然都係不了。易順鼎作為劉永福嘅馬仔都算唔話得,見到張之洞咁嘅反應,易順鼎就提議與其等劉永福喺台南戰死等死,倒不如俾個命令佢叫佢返返大陸,咁清廷就算輸都重有個將才嘛,但張之洞依然都係唔理就唔理。劉永福喺知道之呢啲嘢之後,用咗好多方法都籌唔到旗,所以無幾耐之後佢就做好退守嘅準備,一個月內三道Send電報俾張之洞問佢佢應該是留是退,到最後張之洞終於覆咗佢,同佢講話呢啲嘢我唔知嫁,我之前無應承過話一定會幫你,依家你哋U Lum U 啦。之後張之洞又寫咗封信俾劉永福同佢講話朝廷又無話唔俾你走,你唔使係咁問朝廷幾時落指令俾你走嫁嘛你中意走咪走囉。到劉永福守到最後日軍兵臨城下,靠住喬裝婦人借英國商船走佬返大陸,自此南部台灣民主國減亡。由台灣民主國成立果日計到日軍佔領台南果日,前後歷時四個月又二十六日,加加埋埋建國只有一百四十八日,到最後就係一班嚟自彼岸嘅官利用台灣進行清廷俾佢哋嘅政治任務,搞到台灣一鑊粥之後就個個走佬返大陸,留低台灣一Pet蘇州屎喺度俾台灣嘅人去應付日本人。呢個就係台灣民主國嘅本質,一個名義上走「民主共和制」但實際上都只不過係掛羊頭賣狗肉,到最後都係果個成堆高官唔知點解喺度互相扯後腿,殘破不堪嘅清帝國垂死嘅掙扎手段。

綜觀成個台灣民主國前後,台灣人本身對日本嘅抵抗係嚟自一個自我防衞嘅本能同帶有些少中華色彩嘅反日情緒,呢個係同果堆本身嚟自彼岸嘅官唔同嘅地方,因為當呢班權貴知道外國唔會插手而又無人幫拖果陣,佢哋就只係會無鞋挽屐走,可以當大陸係佢哋嘅避難所,但係留返喺度繼續抗戰嘅依然都係本土台灣人,佢哋無地方可以去,只會扺抗至彈盡糧絕都在所不惜,簡單啲嚟講就係:生為台灣人,死為台灣鬼。係佢哋最想做到嘅嘢。進入日據時代嘅台灣,喺呢個時代生活之下嘅台灣又係唔係真係咁順民,甘心做日本人嘅二等公民呢?台灣人同日本人之間嘅恩怨情仇又係點嚟嘅呢?日本人以殖民手段高統治台灣嘅呢五十一年又為台灣帶嚟啲乜嘢變化呢?

接住落嚟我哋下一集將會同大家探討一下日本係點解會對台灣咁有興趣,而台灣喺日據時代之下又係點樣嘅情況。

最後當然都係又要講下今次嘅參考書籍先,今次呢條片嘅參考書籍有兩本,第一本依然都係王育德博士寫嘅《台灣—苦悶的歷史》。王博士係享譽國際嘅台語語言學家,亦都係台灣獨立運動嘅先驅同精神領袖,而佢本身嘅身世都係十分悲慘,而佢嘅身世同佢嘅人生都會喺我哋嚟緊之後嘅《台灣超簡略史》入面提到,對佢嘅身世有興趣嘅朋友就記得留意喇。而另外一本就係由駱芬美博士寫嘅《被扭曲的臺灣史:1684~1972撥開三百年的歷史迷霧》,入面寫咗十個新嘅歷史解讀觀點,不過呢個我就建議大家先行睇熟咗好基礎嘅台灣史之後先再睇呢本書,如果唔係嘅話好大機會會唔知佢講緊乜。呢兩本書大家有興趣可以買嚟睇下,又或者唔買住都得,因為都係果句啦,嚟緊我呢個台灣史系列都會有好多唔同嘅參考書籍,大家可以等我完哂成個系列之後,我會再出一張參考書籍嘅書單,到時大家再一次過去買去揾嚟睇亦得,咁樣就會方便大家好多喇。

今集嘅《做乜嘢懶人包》就講到呢度先,唔知大家對講到依家嘅台灣歷史有無啲咩問題呢?不妨留個言話俾我知啦。重有嘅就係記得Follow埋我哋HappyKongner唔同平台嘅社交媒體,喺果度你會得到我哋最新嘅資訊,最重要嘅就係Facebook啊,愷哥Ringo 何麒寫文寫得好辛苦嫁,記得上去睇返,Like 返同Share俾身邊嘅人睇喇。而如果你想得到關於我米迦嘅最新資訊嘅話就記得Follow我嘅Instagram喇!

最後都係果句,中意呢條片嘅朋友就記得要 Like Comment Subscribe 同 Share 喇!

我係米迦,下一集《做乜嘢懶人包》再見!

***謄本內容只反映影片創作者之立場,與燕子生命一概無關***

1

IMG_1410.PNG

在囚手足能夠接觸外間資訊的渠道寥寥可數,Youtube 機頂盒為每星期從 Youtube 上挑選不同種類的專題影片並製作成謄本、印刷成信件並寄到在囚手足手上的長期計劃。

你唔需要使用真實身份同披露自己地址就可以同手足做筆友喇!

立即登記成為筆友啦!話俾在囚手足知我哋無忘記佢!

其他最新謄本

https-::www.youtube.com:watch?v=TSJwMZvw

《花姐ERROR遊》EP6-Julia的挑戰

ViuTV | 娛樂類

https-::www.youtube.com:watch?v=TSJwMZvw

《花姐ERROR遊》EP5-黐線邊爐

ViuTV | 娛樂類

https-::www.youtube.com:watch?v=TSJwMZvw

《喱騷-尋找他媽的故事》第1季第4集

喱騷 | 娛樂類

https-::www.youtube.com:watch?v=TSJwMZvw

【挑戰】在旺角玩不准做挑戰!情侶互相陷害!對不起害到你!

arhoTV | 娛樂類

https-::www.youtube.com:watch?v=TSJwMZvw

【挑戰】女友摸過的全都買!一摸即買挑戰!最後會破產嗎?!

arhoTV | 娛樂類

0